Ўзбекистон Президенти Шавкат Мирзиёевнинг жорий йил 25 октябрдаги «Ўзбекистон Республикасида кимё саноатини ривожлантириш чора тадбирлари тўғрисида»га қарорида кимё саноатини ривожлантиришда ва инвестицияларни жалб қилишда муаммолар борлиги айтилади, деб ёзади ЎзА.
Шунингдек, мазкур қарорда кимё маҳсулотлари ишлаб чиқариш соҳасида жаҳон кимё саноати ривожланишининг тенденцияларини ва республиканинг муҳим хом ашё салоҳиятини ҳисобга олувчи фундаментал илмий база ва замонавий лойиҳа-инжиниринг ишланмалари мавжуд эмаслиги таъкидланди.
Қарорга кўра, Ўзбекистон Республикаси Тикланиш ва тараққиёт жамғармасига ва қайта молияловчи тижорат банкларига кимё саноатида янги инвестициявий лойиҳаларни тайёрлаш мақсадида лойиҳа ҳужжатларини ишлаб чиқиш ва тадқиқот ишларини амалга ошириш учун «Ўзкимёсаноат» акциядорлик жамияти ва унинг таркибига кирувчи хўжалик жамиятларига кредитлар ажратишга рухсат берилади.
Жамғарма томонидан янги инвестиция лойиҳаларини тайёрлаш учун кредитлар шартномада белгиланган, бироқ 5 миллион АҚШ доллари эквивалентидан кўп бўлмаган миқдорда ажратилади. Хорижий инвесторлар билан ҳамкорликда молиялаштириладиган янги инвестициявий лойиҳаларни тайёрлаш учун ажратиладиган кредит миқдори 10 миллион АҚШ доллари эквивалентигача кўпайтирилиши мумкин.
Ажратилган кредитлар ва улар бўйича барча харажатлар техник-иқтисодий асос тасдиқланиши жараёнида лойиҳалар қийматига киритилади ва уларнинг қайтарилиши лойиҳалар амалга оширилганидан кейин, объектлар ишга туширилганидан сўнг олинган даромадлар ва лойиҳа ҳужжатларини инвесторларга сотишдан тушган Жамғарма маблағлари ҳамда қарз олувчининг умумхўжалик фаолиятидан олинган даромадлар ёки «Ўзкимёсаноат» АЖ маблағлари ҳисобидан амалга оширилади.
Изоҳ (0)