Ўзбекистон Мудофаа вазирлиги ҳарбий хизматчилари Буюк Британиянинг Брекон шаҳрида қўшин разведкачилари ўртасида ўтказилган «Кембрия патрули» халқаро танловида биринчиликни қўлга киритди. Бу ҳақда Мудофаа вазирлиги матбуот хизмати «Дарё»га маълум қилди.
15−17 октябрь кунлари Ўзбекистон Мудофаа вазирлиги ҳарбий хизматчилари гуруҳи Буюк Британияда разведка бўлинмалари ўртасидаги «Кембрия патрули» халқаро мусобақасида иштирок этди.
Мусобақада 34 давлатдан 123 та жамоа қатнашди. «Кембрия патрули» мусобақаси 40 йилдан буён Уэльсда анъанавий равишда ўтказиб келинади. Ушбу танлов дунё ҳарбий хизматчилари ичида ўтказиладиган энг мураккаб ва нуфузли мусобақалардан бири ҳисобланиб, уни махсус бўлинмаларга саралаш жараёни билан ҳам таққослашади. Бунда асосий эътибор ҳарбий хизматчиларнинг жисмоний ва руҳий тайёргарлигига қаратилган.
Иштирокчилар Кембрия тоғларида тўлиқ жанговар қуролланган ҳолда ҳеч қандай навигация воситаларисиз камида 25 килограмм юк билан 70 километр масофани босиб ўтишда 1500 метр баландликка кўтарилиб, 1000 метр тик нишабликни 48 соат ичида босиб ўтишлари лозим.
Иккинчи ўрин Буюк Британия, Ҳиндистон ва Франция жамоаларига насиб этган бўлса, учинчи ўринни Буюк Британия ва Қозоғистондан келган жамоалар эгаллади. Қизиқарли жиҳат, ушбу танловда Англиянинг 90 та жамоаси иштирок этди.
Нуфузли мусобақада ғолиб бўлган ўзбекистонлик ҳарбийлар Ислом Каримов номидаги Тошкент халқаро аэропортида тантанали равишда кутиб олинди.
Шундан сўнг, Қуролли кучлар давлат музейида ғолибларни шарафлашга бағишланган маросим бўлиб ўтди. Тадбирда мудофаа вазирининг биринчи ўринбосари – Қуролли Кучлар Бош штаби бошлиғи генерал-майор Павел Эргашев, Ўзбекистонда аккредитациядан ўтган хорижий мамлакат элчихоналарининг ҳарбий атташелари, ғолиб жамоа ва уларнинг яқинлари, давлат ва жамоат ташкилотларивакиллари ҳамда ўқувчи ёшлар иштирок этди.
Кеча, 22 октябрь куни Мудофаа вазирлиги марказий аппаратида «Кембрия патрули» танловининг ғолибларини тақдирлашга бағишланган тантанали маросим бўлиб ўтди.
Тадбирда сўзга чиққан Мудофаа вазири Абдусалом Азизов Ўзбекистонга олтин медаллар билан келган ғолиб жамоа аъзоларини қутлади ва ўтган йилларга нисбатан вазирлик қўшинларида жанговар тайёргарлик машғулотлари бир неча марта ҳам сифат, ҳам сони бўйича кўпайгани эвазига мана шундай ютуқларга эришилаётганини таъкидлади.
Шунингдек, тадбирда иштирок этган ғолиб ҳарбий хизматчиларнинг ота-оналарига миннатдорчилик билдирилди. Тўққиз нафар танлов ғолиби Ўзбекистон мудофаа вазирининг «Намунали хизмати учун» кўкрак нишони ҳамда қимматбаҳо совғалар билан тақдирланди.
Шу куннинг ўзида зафар қозонган ҳарбий хизматчилар ва уларнинг яқинлари учун мудофаа вазири номидан байрам дастурхони ёзилди.
Изоҳ (0)