Тошкент шаҳрининг Мирзо Улуғбек туманидаги 433-сонли MTMнинг 37 нафар тарбияланувчиси бундан бир неча кун олдин озиқ-овқатдан заҳарланиши оқибатида касалхонага ётқизилганлиги ҳақида хабар берилган эди. Мактабгача таълим вазирлиги ушбу ҳолат юзасидан ўрганишлар натижасини эълон қилди.
Ҳозирги вақтда барча болалар касалхонадан чиқарилди. Болалардан таҳлил намуналари олиниб, Давлат санитария-эпидемиология назорати (ДСЭН) бактериологик лабораториясига юборилди.
ДСЭН хулосаси бўйича Лаборатория таҳлили натижалари «Овқат тайёрлаш технологиясининг қўпол бузилиши ва санитар қоидаларга риоя қилмаганлик сабабли, 2018 йилнинг 5 октябрида 433-сонли MTMнинг ошпазлари томонидан тайёрланган «тефтеллар» да эҳтимол «Shigella Flexner 1b serotipi» (халқаро касалликлари таснифи бўйича А05.8) овқатдан заҳарланишни келтириб чиқарган.
Аммо айнан Shigella Flexne оқибатида овқатдан заҳарланишнинг дастлабки ташхиси тўлиқ тасдиқланмаган. Ташхис натижаларига кўра, 37 нафар боладан фақат 6 нафарида ушбу микроорганизм аниқланди.
Шунингдек махсус совутгичдаги қопқоқли стерил шиша идишларда сақланадиган кунлик овқат намуналари ҳам текширилди. Намуна сўнгги овқатланишдан 72 соат кейин (8 октябрда) олинган. Узоқ вақт ўтганига қарамай, лабораторияда бактериологик текширувлар овқат намунасидан «Shigella Flexne»ни топмади.
ДСЭН хулосасидан:
- Лаборатория текширувлари натижаларига кўра, санитария меъёрларига амал қилинмаганлиги аниқланди. Яъни 2 та намунада (хом гўшт ва сутли какаода), ичак таёқчалари бактериялари гуруҳи (ИТБГ), ичак мезофил аэроб ва факултатив анаэроб микроорганизмлари (ИМАФАМ) аниқланди.
- Жамоат ошхонасидаги 66 та микробиологик ювиш таҳлиллардан 28 тасида ИТБГ аниқланди, бу эса технологик ускуналар ва идишларнинг бактериал ифлосланишини кўрсатади
- Гуруҳларда танланган 57 та ювиш таҳлиллардан 18 тасида идишларнинг бактериал ифлосланишини кўрсатадиган ИТБГ аниқланди
- Болалар ва ходимлардан ичак гуруҳига мансуб инфекцияларни аниқлаш учун тўсатдан 167 намуна текшириш учун олинди (лаборатория натижалари бўйича салбий натижалар йўқ).
- Эпидемиологик текшириш ва лаборатория тадқиқотлари натижалари муассасанинг ошхонасида санитария меъёрлари ва қоидаларига риоя қилмасликни кўрсатмоқда
Бундай бактериялар одамларга ифлосланган озиқ-овқат маҳсулотларини (хом гўшт ёки қийма, хом-сут, ифлосланган хом-сабзавотларнинг етарли термик ишлов берилмаганлиги) истеъмол қилиш йўли билан юқади.
Бактериялар 70 даражадан юқори ҳароратларда овқат маҳсулотларини термик қайта ишлаганда ҳалок бўлади.
Текширув натижаларига кўра, MTM нинг 15 нафар ходими, режали тиббий кўрикдан ўтмаганлиги учун ишдан бўшатилди.
Ҳамшира ва барча ошхона ходимлари ҳам ишдан бўшатилди. MTM раҳбарининг лавозимига мос келиш масаласи кўриб чиқилмоқда.
Аниқланган қоидабузарликлар бўйича материаллар Бош прокуратурага берилди.
Изоҳ (0)