Ўзбекистон—Россия орасида мева-сабзавот экспорти бўйича 390,8 млн долларлик 14 та шартнома имзоланди

«Ўзбекистон—Россия» ҳудудлараро ҳамкорлик форуми доирасида Сурхондарёда учрашувлар чоғида ҳудудлараро ижтимоий-иқтисодий алоқаларни ривожлантириш бўйича битим, инвестицион лойиҳаларни амалга ошириш ва мева-сабзавот маҳсулотларини экспорт қилиш бўйича жами 390,8 млн долларлик 14 та шартнома имзоланиб, келгусида 2 та улгуржи-таъминот маркази, 1 та савдо уйини ташкил этишга келишиб олинди. Бу ҳақда Сурхондарё вилояти ҳокимлиги матбуот хизмати хабар берди.

Форумдан сўнг «ТХ Сибирский Гигант» МЧЖ директори Александр Мансуров бошчилигидаги бир гуруҳ россиялик ишбилармонлар Сурхондарё вилоятига ташриф буюрди. Ташриф давомида улар Термиз туманидаги «Марварид» дам олиш маскани, «Gold Agro Fresh» агрофирмасидаги иссиқхона мажмуаси, «Gold Dreid Fruits» МЧЖнинг мева-сабзавотни қайта ишлаш ва сақлаш фаолияти, «Termez Cargo Centre» МЧЖ томонидан ташкил этилган Халқаро логистика маркази ҳамда Шеробод туманида ташкил этилган анорзорлар билан яқиндан танишдилар.

Ташриф сўнгида «ТХ Сибирский Гигант» МЧЖ билан Россия буғдойини «Сурхон импорт экспорт агро» МЧЖда қайта ишлаган ҳолда Афғонистонга экспорт қилиш бўйича ўзаро келишувга эришилди.