Фарғона вилоятининг Олтиариқ туманида яшовчи фуқаро Л.А. мажбурий ижро бюросининг туман бўлимига ариза билан мурожаат қилди. Бу ҳақда «Дарё»га МИБ Фарғона вилоят бошқармасининг жамоатчилик билан алоқалар ва ҳуқуқий ахборот бўйича катта инспектори Ж.Одилов хабар берди.
Аризада қайд этилишича, Олтиариқ тумани электр таъминоти корхонаси ишчиси И.Х. 2017 йилнинг июль ва сентябрь ойларида фуқаро Л.А.дан электр энергияси учун 400 минг сўм пул олиб, ўзлаштириб юборган.
Мазкур ҳолат юзасидан ўтказилган текширувда электр таъминоти корхонаси дастурида фуқаро Л. А.га тегишли ҳисоб рақамидаги шахсий ҳисобварағига 400 минг сўм кирим қилинмай, зарар ўрни корхона ҳисобчиси И.Х.га тегишли электрон калит ёрдамида эгаси аниқланмаган пул маблағи ҳисобидан қоплаб қўйилгани аниқланди.
Шунингдек, 2017 йилнинг май ойидан жорий йил июнига қадар юқоридаги жиноий усул билан 63 нафар фуқаронинг электр учун тўланган 30 миллион 638 минг сўм пул маблағи талон‑торож қилиниб, уларнинг ўрни бошқа ҳисоб рақамларда турган эгаси аниқланмаган пул маблағлари ҳисобидан қоплаб қўйилган.
Суриштирув давомида И.Х. томонидан 30 миллион 638 минг сўмлик зарар тўлиқ қопланди.
Мазкур ҳолат юзасидан жиноят иши қўзғатилиб, тергов ҳаракатлари олиб борилмоқда.
Изоҳ (0)