Халқ таълими вазирлиги ва Россиянинг «Дневник.ру» компанияси умумтаълим мактабларида электрон журналлар ва кундаликларни жорий этиш бўйича лойиҳани амалга оширади. Бу ҳақда вазирлик матбуот хизмати маълум қилди.
Халқ таълими вазирлигига АКТни жорий этиш йўлида давлат-хусусий шерикчилиги кўринишида ҳамкорлик қилиш таклифига асосан келиб тушган аризаларни ўрганиш натижасида Россия компаниясининг ташаббуси маъқулланди.
Ушбу лойиҳани амалга оширишда «Дневник.ру»нинг Ўзбекистондаги вакили «Кундалик» компанияси иштирок этади ва барча харажатларни ўз зиммасига олган ҳолда мазкур.тизимни жорий қилиш, фаолиятини таъминлаш ва ривожлантириш ишларини олиб боради.
«Кундалик» лойиҳаси Ўзбекистондаги мактабларда фанларни ўзлаштириш даражаси ва давоматни қайд этиш тизимини жорий этишга қаратилган. «Кундалик» рақамли таълим платформаси Россия мактабларида жорий этилган «Дневник.ру» ахборот тизими асосида ишлаб чиқилади.
Тизим онлайн тарзда ўқитувчиларни дарсларини режалаштириш, дарс жадвалларини тузиш, ўқувчиларнинг ўзлаштириш даражаси ва давоматини электрон журнал ва кундаликларда қайд этиб бориш, шунингдек, таълим бошқарув органлари ва муассасаларга статистик ҳисоботларни шакллантириш учун хизмат қилади.
«Кундалик» тизими ўқувчилар ва уларнинг ота-оналарига 24 соат давомида баҳолар ва уй вазифалари ҳақидаги маълумотларни кузатиб бориш имконини беради. Шу билан бирга, улар ҳимояланган ижтимоий тармоқ орқали мулоқот қилиши ҳамда онлайн кутубхона ва таълимга оид медиа ресурслардан фойдаланиши мумкин.
Изоҳ (0)