GM Uzbekistan Spark автомобилларини имтиёзли автокредитлаш бўйича акция ниҳоясига етганини маълум қилди

Infinbank АТБ билан биргаликда Spark R2 Optimum А/Т автомобилини имтиёзли автокредитлаш бўйича ташкил этилган акциянинг илк кунидаёқ ажратилган автомобилларнинг деярли барчасига шартномалар тузиб бўлинган эди. Бу ҳақда GM Uzbekistan хабар бермоқда.

Харидорлар ўртасидаги юқори талабни инобатга олган ҳолда ушбу акцияга қўшимча тарзда 235 дона R2 Comfort А/Т комплектациясидаги Spark автомобили киритилди.

R2 Optimum А/Т ва R2 Comfort А/Т комплектациясидаги Spark автомобилларнинг акция учун ажратилган барча миқдори ниҳоясига етди. Шу муносабат билан GM Uzbekistan Infinbank АТБ билан ушбу акциянинг муваффақиятли якунланганлигини маълум қилган ҳамда мазкур тадбирга юқори қизиқиш билдирган барча мижозларга иштирок этганликлари учун ўз миннатдорчилигини билдирган.

Келгусида компания янада кўпроқ акциялар ўтказиш, шунингдек, имтиёзли автокредитлаш учун моделлар қаторини кенгайтиришни режалаштирган.