Кеча, 14 октябрь санасида Миллатлар Лигаси мусобақаси доирасида Германия терма жамоаси сафарда Нидерландия термасига қарши майдонга тушиб, 0:3 ҳисобида мағлубиятга учради.
Кечаги беллашув жамоа бош мураббийи Йоахим Лёв учун терма жамоа бошқарувидаги 168-ўйин сифатида тарихдан ўрин олди. Лёв шу тариқа терма жамоани бошқариш борасида мутлақ рекордчига айланди. Ундан кейинги ўринда Зепп Хербергер бормоқда. Зепп ҳисобида 167 та ўйин бор.
Германия терма жамоаси эса 2018 йилдаги 5-мағлубиятини қабул қилиб олди. «Бундестим» жорий йилда ЖЧ-2018 доирасида Жанубий Корея (0:2), Мексика (0:1) ҳисобида мағлуб бўлганди. Шунингдек, немислар Австрия (1:2), Бразилия (0:1) терма жамоаларига қарши ўтган ўртоқлик учрашувларида ҳам ютқазганди. Шу тариқа Германия терма жамоаси 1985 ва 1956 йилда қайд этган антирекордини такрорлади. Ўша йилларда ҳам жамоа 5 тадан учрашувда мағлуб бўлганди.
Шунингдек, терма жамоа биринчи марта кетма-кет 3 расмий ўйинда гол ура олмади.
Изоҳ (0)