Президент ҳузуридаги Давлат бошқаруви академиясида «Минтақавий тинчлик ва барқарорликни таъминлашда Ўзбекистон – Ҳиндистон ҳамкорлиги: муаммо ва истиқболлар» номли янги китоб тақдимоти бўлиб ўтди. Бу ҳақда ЎзА хабар берди.
Мазкур китоб Президент ҳузуридаги Стратегик ва минтақалараро тадқиқотлар институти билан Ҳиндистоннинг бирлашган ҳарбий тадқиқотлар институти ўртасидаги амалий ҳамкорлик самарасидир. Уни тайёрлашда икки мамлакатнинг узоқ йиллик тажрибага эга етакчи олим ва экспертлар гуруҳи, мутахассислар қатнашган.
Унда мамлакатимизда амалга оширилаётган кенг кўламли ислоҳотларнинг ички ва ташқи сиёсатдаги устувор йўналишлари, Ўзбекистон билан Ҳиндистон ўртасидаги икки томонлама муносабатларни кенгайтиришдаги истиқболлар, шунингдек, Марказий Осиё минтақаси мамлакатлари ва Афғонистон билан келгусидаги ҳамкорликка оид қатор йўналишлар таҳлили келтирилади.
Беш бўлимдан иборат китоб инглиз тилида Ҳиндистонда нашр этилган. Унда Марказий Осиё минтақасида хавфсизликка таҳдид, Афғонистонда барқарорликка эришиш бўйича икки мамлакат тутуми ва ёндашувлари, минтақавий транспорт коммуникациялари ва савдо соҳасидаги ҳамкорлик, ёшлар ўртасида радикализм ва экстремизмга қарши курашишда Ўзбекистон – Ҳиндистон тажрибаси каби масалаларга алоҳида эътибор қаратилган.
Изоҳ (0)