Google компанияси Google+ 2019 йил охиригача ёпилишини эълон қилди

Google компанияси Google+ ижтимоий тармоғини оддий одамлар учун ёпиб, фақат корпоратив мижозлар учун қолдиришини эълон қилди, деб ёзади TJournal.

Бу 2019 йил августида сервиснинг оммабоплик даражаси паст бўлгани туфайли амалга оширилади. Маълум бўлишича, сеансларнинг 90 фоизида ижтимоий тармоқдан кўпи билан беш сония фойдаланишади.

8 октябрь куни компания ижтимоий тармоқни ёпиши ҳақида эълон қилишидан бироз аввал The Wall Street Journal юз минглаб фойдаланувчиларнинг маълумотлари сизиб чиқиб кетгани ҳақида хабар берган эди. Google компанияси Google ҳамда Android-қурилмалар мижозлари маълумотлари ҳимояси билан боғлиқ муаммолар борлигини тан олди.

Ёпиқ маълумотлар (аммо у ерда ёзишмалар ёки контактлар бўлмаган, фақат фотосуратлар, электрон почта манзиллари, шунингдек, ёш ва жинс ҳақидаги маълумотлар) 2015 йилдан 2018 йил мартгача сизиб чиқишда давом этган.