Ўзбекистонда чилим ва электрон сигареталар чекишни чеклаш тўғрисидаги қонун кучга кирди

2018 йил 4 октябрдан бошлаб «Жамоат жойларида чилим ва электрон сигареталар чекишни чеклаш тўғрисида»ги қонун кучга кирди, деб ёзади Spot.

Чилим ва электрон сигареталар чекишни реклама қилиш, яъни чилим ва электрон сигареталар чекиш усуллари ва йўллари, шунингдек уларни олиш жойлари тўғрисидаги маълумотларни тарқатишга қаратилган фаолиятга йўл қўйилмайди.

Чилим ва электрон сигареталар чекишни тарғиб қилиш, яъни чилим ва электрон сигареталарни чекишни рағбатлантирувчи, шахсда уларни истеъмол қилишнинг зарарсизлиги ҳақидаги тасаввурни шакллантирувчи ғоялар, қарашлар ва бадиий образларни очиқ ёки яширин шаклда тарқатишга қаратилган ҳаракатлар тақиқланади.

Шунингдек, чилим ва электрон сигареталар чекиш савдо мажмуалари, овқатланиш жойлари, кинотеатр ва театрлар, музейлар, клублар, кўп квартирали уйларнинг йўлаклари каби жамоат жойларида чекиш тақиқланади.

Жамоат жойларида чилим ва электрон сигареталар чекишни чеклаш тўғрисидаги қонун ҳужжатларининг ижро этилиши устидан назоратни ички ишлар органлари ўз ваколатлари доирасида амалга оширади.

Маълумот учун, электрон сигарета никотинни ёки никотинсиз маҳсулотни етказиш воситаси сифатида фойдаланиладиган, нафас олиб ютиш учун мўлжалланган аэрозоль (буғ) ҳосил қиладиган электрон мосламадир.