Жорий йилда Самарқанд вилоятининг Нарпай туманида «Мароқанд сифат» масъулияти чекланган жамияти томонидан кластер усулида пахта етиштирилди. Айни пайтда 7 минг гектардан ортиқ майдондаги ҳосилни йиғиштириб олишга киришилган, дея хабар беради ЎзА.
— Вилоятда илк бор бизнинг туманда кластер усули қўлланилиб, 224 фермер хўжалигига қарашли 7 минг 136 гектар пахта майдони «Мароқанд сифат» МЧЖ га бириктирилди, — дейди Нарпай тумани қишлоқ хўжалиги бўлими бошлиғи А.Тожиев. — Жамият мутасаддилари ишни хорижий тажриба асосида ташкил этиб, ерни тайёрлаш, чигит экиш, ғўзага ишлов бериш ва бошқа агротехник тадбирларни аниқ режа ва ҳисоб-китоб асосида ташкил этди. Фермер хўжаликлари ихтиёридаги техникалар қаторига хориждан келтирилган замонавий ҳайдов тракторлари ва бошқа зарур техника воситалари қўшилди. 70 сантиметрли қаторга чигит экилди. Барча майдонларда томчилатиб суғориш усули қўлланилди. Бу жорий йилги сув танқислиги шароитида жуда қўл келди ва кўзланган ҳосил етиштирилди.
Дарвоқе, жамият замонавий усулда пахта етиштириш учун Туркиядан қишлоқ хўжалик техникалари олиб келиш билан бирга, соҳа бўйича мутахассисларни ҳам таклиф этди. Улар маҳаллий фермерларга пахта агротехникаси бўйича маслаҳат бериб, ҳамкорликда ишлади.
— Туркиялик фермерлар тажрибасини ўрганиш давомида уларда ўртача ҳосилдорлик 55 центнерни ташкил этишини кузатдик, — дейди «Мароқанд сифат» МЧЖ ходими Рустам Ҳамроев. — Юқори ҳосилдорлик ҳатто 70 центнергача чиқар экан. Шу боис, Туркиядан мутахассис чақириб, замонавий технология асосида пахта етиштиришни йўлга қўйдик. Фермерлар янги усулларни тез ўзлаштириб олишди. Барча агротехник тадбирларни белгиланган меъёрлар асосида амалга оширдик. 1000 га яқин янги иш ўрни яратилди. Ҳозирда кластерга бириктирилган фермер хўжаликларининг барчасида терим қизғин давом этмоқда. Аксарият хўжаликлар биринчи теримдаёқ шартномада белгиланган режани бажаряпти. Ҳосилни асосан, қўл кучи ёрдамида йиғиштириб оляпмиз. Маҳаллаларда ташкил этилган теримчилар отрядлари бу борада бизга яқиндан ёрдам бермоқда. Уларга бир килограмм пахта учун 750 сўмдан меҳнат ҳақи тўлаяпмиз. Кунлик ва беш кунлик терим илғорлари қўшимча равишда рағбатлантириб борилмоқда.
Далалардан йиғиштириб олинган ҳосил жамият корхонасида қайта ишланмоқда ва толадан ип калава, сўнгра кийим-кечак, гилам ишлаб чиқариш кўзда тутилган. Чигит эса ҳозирча махсус омборларда жамғарилмоқда. Яқинда ёғ ишлаб чиқариш заводи қурилиши билан бу маҳсулот ҳам шу ернинг ўзида қайта ишланиб, бир неча турдаги истеъмол товарлари ишлаб чиқариш йўлга қўйилади.
Самарқанд вилояти қишлоқ хўжалиги бошқармаси маълумотларига кўра, 2019 йилда вилоятда пахтачилик бўйича 13 та ана шундай кластер ташкил этилади.
Изоҳ (0)