Фарғонадаги Латвия Ахборот тизимлари менежменти олий мактаби филиалига жорий ўқув йилида 125 нафар талаба қабул қилинади. Филиалда ўқиш истагида бўлган абитуриентлар 7 октябрга қадар электрон тарзда ҳужжат топшириши мумкин. Бу ҳақда «Дарё» мухбири Азизжон Эрматов хабар берди.
Филиалда ўқитиш тўлов-контракт асосида Ўзбекистон Республикаси давлат таълим стандартлари талабларини эътиборга олган ҳолда Олий мактаб томонидан тасдиқланган ўқув режа ва дастурлар бўйича асосан инглиз тилида кундузги шаклда амалга оширилади.
Филиалда талабалар туризмда тадбиркорлик фаолияти ва уни бошқариш, меҳмонхона хўжалигини ташкил этиш ва бошқариш, ресторан хўжалигида тадбиркорлик фаолияти йўналишлари бўйича таълим олади.
Филиал битирувчиларига Ўзбекистон Республикасида олий таълим тўғрисидаги ҳужжат сифатида тан олинадиган Олий мактабнинг белгиланган намунадаги дипломи берилади.
Президентнинг 2018 йил 26 сентябрдаги қарори билан Фарғона давлат университетида ташкил этилган филиалда олтита йўналишда бакалавр ва иккита мутахассисликда магистрлар тайёрланади.
Латвия ахборот тизимлари менежменти олий мактаби ўқув жараёнига илғор педагогик ҳамда ахборот технологиялари, фан ва техниканинг энг янги ютуқларини жорий этиш, кутубхона фондини замонавий ўқув, ўқув-методик ҳамда илмий-техник адабиётлар билан шакллантириш ва тўлдиришга кўмаклашади.
Изоҳ (0)