Мажбурий ижро бюроси Косонсой туман бўлими ва туман маъмурий суди томонидан ўтказилган сайёр судда алимент тўлашдан бош тортиб келган уч нафар фуқаронинг иши кўриб чиқилди. Бу ҳақда «Дарё»га МИБ Наманган вилоят бошкармаси жамоатчилик билан алокалар ва хукуқий ахборот бўлими маълум қилди.
С.Қ. бир неча бор огоҳлантирилишига қарамай фарзандининг моддий таъминоти учун алиментни йиллар давомида тўлашдан бўйин товлаб келган. У салкам 13 миллион сўм қарзи учун тегишли тартибда ўн беш сутка қамоқ жазосига тортилди.
Н.Х. икки нафар фарзанди учун тўлаши керак бўлган алиментлари тўпланиб, суммаси салкам 10 миллион сўмга етса ҳам парво қилмади. Расман 3 маротаба огоҳлантиришдан сўнг унга ҳам 15 суткалик қамоқ жазоси берилди.
О.Ш. ҳам икки нафар фарзанди олдидаги қонуний бурчини бажармаганлиги туфайли алиментдан қарздорлиги 5 миллион сўмдан ошди. Унга нисбатан ҳам суд 15 суткалик қамоқ жазосини тайинлади.
Маълумот учун, МИБ Косонсой туман бўлими томонидан жорий йилнинг 8 ойи давомида 1320 нафар алиментчидан 923 миллион сўм ундирилди.
Изоҳ (0)