Андижон шаҳридаги ҳаракат серқатнов бўлган 7 та чорраҳаларда маъмурий қоидабузарликларни автоматик қайд этувчи видео камералар жорий йилнинг 1 июнь кунидан бошлаб ишлаб келмоқда. Ушбу видео камераларнинг 100 кунлик иш натижаларига кўра 38 минг 825 та (12 миллиард 083 миллион 822 минг 220 сўмлик) қоидабузарликлар аниқланди. Бу ҳақда «Дарё»га Андижон вилояти ИИБ матбуот хизмати хабар берди.
«Лекин ҳозирги кунда видео камералар билан боғлиқ айрим тушунмовчиликлар ҳам содир бўлиб турибди. Масалан, видео камера ўрнатилган чорраҳада ҳайдовчи светофорнинг яшил чироғини ёнишини кутиб тўхтаб турган вақтда, унинг орқасидан тез тиббий ёрдам ёки ёнғин ўчирувчи автомашина махсус сигналларини чалган ва маёқчаларини ёққан ҳолда чорраҳадан имтиёз билан ўтиб кетмоқчи бўлади.
Бундай вақтларда чорраҳада тўхтаб турган автомашина ҳайдовчилари имтиёзлик махсус автомашиналарга стоп чизиғини ёки йўл бўлакларини ажратиб турувчи йўл чизиқларини босган ҳолда йўл бергани қўрқади. Бу қўрқувга ҳақиқатдан ҳам асос бор. Сабаби ҳайдовчи юқоридаги ҳолатларда ҳар иккала йўл чизиғини босса ҳам видео камера қоидабузарликни қайд қилади. Лекин видео камера фаолиятини ва аниқланган қоидабузарликларни кузатиб ўтирган оператор бундай ҳолатларни маъмурий қоидабузарлик содир этилди деб ҳисобга олмайди ва ҳайдовчиларнинг яшаш ва ишлаш манзилларига маъмурий қоидабузарликка оид қарорни юбормайди», — дейилади хабарда.
Изоҳ (0)