Andijon shahridagi harakat serqatnov bo‘lgan 7 ta chorrahalarda ma’muriy qoidabuzarliklarni avtomatik qayd etuvchi video kameralar joriy yilning 1-iyun kunidan boshlab ishlab kelmoqda. Ushbu video kameralarning 100 kunlik ish natijalariga ko‘ra 38 ming 825 ta (12 milliard 083 million 822 ming 220 so‘mlik) qoidabuzarliklar aniqlandi. Bu haqda “Daryo”ga Andijon viloyati IIB matbuot xizmati xabar berdi.
“Lekin hozirgi kunda video kameralar bilan bog‘liq ayrim tushunmovchiliklar ham sodir bo‘lib turibdi. Masalan, video kamera o‘rnatilgan chorrahada haydovchi svetoforning yashil chirog‘ini yonishini kutib to‘xtab turgan vaqtda, uning orqasidan tez tibbiy yordam yoki yong‘in o‘chiruvchi avtomashina maxsus signallarini chalgan va mayoqchalarini yoqqan holda chorrahadan imtiyoz bilan o‘tib ketmoqchi bo‘ladi.
Bunday vaqtlarda chorrahada to‘xtab turgan avtomashina haydovchilari imtiyozlik maxsus avtomashinalarga stop chizig‘ini yoki yo‘l bo‘laklarini ajratib turuvchi yo‘l chiziqlarini bosgan holda yo‘l bergani qo‘rqadi. Bu qo‘rquvga haqiqatdan ham asos bor. Sababi haydovchi yuqoridagi holatlarda har ikkala yo‘l chizig‘ini bossa ham video kamera qoidabuzarlikni qayd qiladi. Lekin video kamera faoliyatini va aniqlangan qoidabuzarliklarni kuzatib o‘tirgan operator bunday holatlarni ma’muriy qoidabuzarlik sodir etildi deb hisobga olmaydi va haydovchilarning yashash va ishlash manzillariga ma’muriy qoidabuzarlikka oid qarorni yubormaydi”, — deyiladi xabarda.
Izoh (0)