Ўзбекистон мудофаа вазири генерал-майор Абдусалом Азизов Тожикистоннинг Сўғд вилояти жойлашган полигонда ҳамкорликда ўтказилган қўшма машғулотларда фаоллик ва намуна кўрсатган бир гуруҳ тожикистонлик ҳарбийларни Ўзбекистон Мудофаа вазирлигининг «Жанговар ҳамдўстликни мустаҳкамлашдаги хизматлари учун» кўкрак нишонлари ва эсдалик совғаларни билан тақдирлади. Ўз навбатида ўзбекистонлик илғор ҳарбий хизматчилар ҳам Тожикистон мудофаа вазири томонидан рағбатлантирилди. Бу ҳақда Ўзбекистон Мудофаа вазирлиги матбуот хизмати «Дарё»га маълум қилди.
Дастлаб икки давлат ҳарбийлари ҳамкорлигида чегара яқинида аҳолини асир олган шартли террорчи кучлар ҳақида маълумотлар ўрганилиб, уларни қўллаб-қувватловчи кучлар авиация ва артиллерия зарбалари орқали йўқ қилинди. Ўзбекистонлик десантчилар шартли душман келиши эҳтимолий йўналишига пистирма ўрнатишди. Жанговар техникалар воситасида ҳарбий хизматчилар аксилтеррор тезкор операциясини муваффақиятли якунлашди.
Ҳамкорликдаги жанговар операцияларнинг асосий қисмини Ўзбекистон ва Тожикистон мудофаа вазирлари кузатиб боришди. 3 кун давом этган амалий машғулотлар икки мамлакат ўртасида ҳарбий ҳамкорликни янада мустаҳкамлашга, чегара ҳудудларида хавфсизликни кучайтиришга, ҳарбий хизматчиларнинг амалий кўникмаларини оширишга хизмат қилди.
Шунингдек, тадбирда Ўзбекистон Қуролли Кучларида фойдаланилаётган қурол-аслаҳа ва ҳарбий техникалар кўргазмаси бўлиб ўтди.
Қўшма машғулотлар якунида Ўзбекистоннинг таниқли эстрада хонандалари томонидан концерт дастури намойиш этилди.
Изоҳ (0)