O‘zbekiston mudofaa vaziri general-mayor Abdusalom Azizov Tojikistonning So‘g‘d viloyati joylashgan poligonda hamkorlikda o‘tkazilgan qo‘shma mashg‘ulotlarda faollik va namuna ko‘rsatgan bir guruh tojikistonlik harbiylarni O‘zbekiston Mudofaa vazirligining “Jangovar hamdo‘stlikni mustahkamlashdagi xizmatlari uchun” ko‘krak nishonlari va esdalik sovg‘alarni bilan taqdirladi. O‘z navbatida o‘zbekistonlik ilg‘or harbiy xizmatchilar ham Tojikiston mudofaa vaziri tomonidan rag‘batlantirildi. Bu haqda O‘zbekiston Mudofaa vazirligi matbuot xizmati “Daryo”ga ma’lum qildi.
Dastlab ikki davlat harbiylari hamkorligida chegara yaqinida aholini asir olgan shartli terrorchi kuchlar haqida ma’lumotlar o‘rganilib, ularni qo‘llab-quvvatlovchi kuchlar aviatsiya va artilleriya zarbalari orqali yo‘q qilindi. O‘zbekistonlik desantchilar shartli dushman kelishi ehtimoliy yo‘nalishiga pistirma o‘rnatishdi. Jangovar texnikalar vositasida harbiy xizmatchilar aksilterror tezkor operatsiyasini muvaffaqiyatli yakunlashdi.
Hamkorlikdagi jangovar operatsiyalarning asosiy qismini O‘zbekiston va Tojikiston mudofaa vazirlari kuzatib borishdi. 3 kun davom etgan amaliy mashg‘ulotlar ikki mamlakat o‘rtasida harbiy hamkorlikni yanada mustahkamlashga, chegara hududlarida xavfsizlikni kuchaytirishga, harbiy xizmatchilarning amaliy ko‘nikmalarini oshirishga xizmat qildi.
Shuningdek, tadbirda O‘zbekiston Qurolli Kuchlarida foydalanilayotgan qurol-aslaha va harbiy texnikalar ko‘rgazmasi bo‘lib o‘tdi.
Qo‘shma mashg‘ulotlar yakunida O‘zbekistonning taniqli estrada xonandalari tomonidan konsert dasturi namoyish etildi.
Izoh (0)