Янгийўлда «Янгибоғ» маҳалла фуқаролар йиғини раиси ва масъул котиби маҳаллада истиқомат қилувчи нафақахўрлардан 25 минг сўмдан йиғиб олгани аниқланди. Бу ҳақда Ўзбекистон Бош прокуратураси ҳузуридаги медиамарказга таяниб, «Газета.uz» хабар бермоқда.
Лавҳада қайд этилишича, йиғиб олинган пуллар қарийб 1,5 миллион сўмни ташкил этган. Пуллар Фарғона водийсидан келган теримчиларнинг ҳар бирини 750 минг сўмдан ёллашга мўлжалланган.
Ҳодиса ҳақида янгийўллик фуқаро Пахта-2018 Telegram-боти орқали мурожаат йўллаганидан сўнг маълум бўлди. мазкур бот ҳуқуқшунос блогер Хушнудбек Худойбердиев томонидан пахта йиғим-терими вақтида қонун бузилиши ҳолатлари ҳақида маълумот тўплаш мақсадида ташкил этилган.
Фуқаро 15 та маҳаллада истиқомат қилувчи нафақахўрлардан пахта кампанияси учун пул йиғилаётганини хабар қилган. Ҳуқуқни муҳофаза қилиш органлари томонидан ўтказилган текширувда фақатгина «Янгибоғ» маҳалласида 71 нафар нафақахўрдан пул йиғилгани маълум бўлди.
Янгийўл прокурори Аслиддин Тошпўлатовнинг сўзларига кўра, нафақахўрлардан пулларни маҳалла масъул котиби йиғиб чиққан. Текширув вақтида у ҳуқуқни муҳофаза қилиш органларига ким қанча пул бергани ёзиб борилган дафтарни топширган.
Барча пуллар ўз эгаларига қайтарилган.
«Янгибоғ» маҳалласи раиси ва котибига нисбатан Ўзбекистон Маъмурий жавобгарлик тўғрисидаги кодекснинг 200- моддаси (ўзбошимчалик) бўйича маъмурий иш қўзғатилди.
Изоҳ (0)