Йўналишнинг масофаси 3000 км, қатновга сарфланадиган умумий вақт 61 соат ва йўлкира ҳақи 500 минг сўм. Тошкентдан Нижний Новгородга халқаро автобус йўналиши очилмоқда. Бу ҳақда Автомобиль транспорт агентлигига таяниб Spot хабар берди.
Хабарга кўра, «Тошкент — Нижний Новгород» автобус йўналишида жорий йилнинг 14 сентябридан бошлаб автобуслар қатнови йўлга қўйилади.
«Ушбу йўналишда Ўзбекистон томондан ташувчи UZKAZ
AVTO TRANS МЧЖ шаклидаги ҚК, Россия томонидан эса ташувчи «Панюшкин С.Ю.» ЯТТ хизмат кўрсатади. Йўловчилар бугунги кунда энг замонавий ва бир қатор қулайликларга эга бўлган VANHOOL русумли автобусларда ўз манзилларига етказилади», дейилади хабарда.
Йўналишнинг масофаси 3000 км., қатновга сарфланадиган умумий вақт 61 соат, йўлкира ҳақи ташувчилар томонидан Тошкентдан Нижний Новгородгача — 500 минг сўм. Нижний Новгороддан Тошкентгача эса — 6 минг рубль қилиб белгиланди.
Йўналиш «Ғишт кўприк» (Ўзбекистон), «Жибек Жоли», «Жайсан» (Қозоғистон), «Сагарчин» (Россия) назорат ўтказиш масканлари орқали амалга оширилади.