«O‘zbekiston 24» каналида эфирга узатилган кўрсатувда танқид қилинган Тошкент шаҳридаги 110-мактабнинг директори юз берган ҳолат бўйича Халқ таълими вазирлигига шикоят қилмоқчи. Лавҳада кўрсатилган ўқувчиларнинг ота-оналари эса «O‘zbekiston 24»ни судга бермоқчи. Бу ҳақда «Турон 24» манбасига таяниб хабар бермоқда.
Халқаро пресс-клубнинг «O‘zbekiston 24» каналида эфирга узатилган навбатдаги сессиясида пойтахтдаги бир қатор мактабларда ўқитувчи ва ўқувчиларнинг формаси талабга жавоб бермаслиги ҳақида сўз боради. Лавҳада калта юбка кийган, соч ўстирган, юзларини бўяган ўқувчилар билан бирга ўқитувчилар ҳам танқид қилинган, бироқ уларнинг юзлари кўрганлар танимас даражада хиралаштирилмаган, яъни айбсизлик презумпсиясига амал қилинмаган.
Мавзкур лавҳа ижтимоий тармоқларда қизғин муҳокамаларга сабаб бўлган. Бу ҳақда фикр билдирганларнинг аксарияти журналистларнинг хатти-ҳаракатларини кескин қоралаган, бундай лавҳани эфирга узатгани учун телеканал раҳбариятини инсон ҳуқуқларини поймол қилишда айблаган.
«Турон 24»га маълум қилишларича, «O‘zbekiston 24» телеканалида эфирга узатилган лавҳа Халқаро пресс клуб томонидан тайёрланган бўлиб, бунинг телеканалга алоқаси йўқ.
Эслатиб ўтамиз, Ўзбекистон халқ таълими вазири Шерзод Шерматов «O‘zbekiston 24» телеканали орқали мактаб формаси ҳақида намойиш этилган видеолавҳа юзасидан ўз фикрини билдириб ўтганди. «Телевидение орқали кимнидир унинг розилигисиз салбий маънода кўрсатаётган пайтда уларни таниб олиш мумкин бўлмаслиги учун, юзларини ёпиш зарур. Цивилизациялашган жамиятда шахснинг, айниқса, болаларнинг омма олдида камситилишига йўл қўйиш мумкин эмас!» — деб ёзган эди вазир.
Изоҳ (0)