Жорий йилнинг 9 сентябрь куни «Тошкент» савдо марказида илк бора тўқимачилик саноати брендларини ўз ичига қамраб олган «Туркистон» тайёр кийим-кечак савдо мажмуасининг очилиш маросими бўлиб ўтди. Бу ҳақда «Ўзтўқимачиликсаноат» уюшмаси хабар берди.
Маросимда «Ўзтўқимачиликсаноат» уюшмаси раҳбарияти, Буюк Британия ва Украинадан ташриф буюрган чет эллик ҳамкорлар, Республика савдо-саноат вакиллари, миллий тўқимачилик бренд асосчилари, корхона вакиллари ва шаҳар меҳмонлари иштирок этди.
Бу мажмуа Ўзбекистон Республикаси Президентининг 2017 йил 14 декабрдаги «Тўқимачилик ва тўқув-трикотаж соҳасини янада жадаллаштириш»га оид 5285-сонли қарори ижросида асосан миллий брендларни қўллаб-қувватлаш, ички бозорда уларнинг мавқеини ошириш ва жаҳон бозорларига сифатли маҳсулотларни етказиб бериш мақсадида ташкил этилди.
Тадбир очилишида сўзга чиққанлар тўқимачилик брендлари томонидан яратилаётган либослар жаҳон бозорида ҳам ўз ўрнини эгаллаётганлигини, сифати ва дизайни жиҳатдан ҳеч бир номдор брендлардан қолишмаётганлиги, рақобатбардошлиги, нархи ва сифати жиҳатидан ҳам истеъмолчига қулайлигини айтиб ўтди.
Мажмуада 30 дан ортиқ миллий брендлар жамланган бўлиб, улар аёллар ва эркаклар кийимлари, болалар устки ва ички кийимлари, пойабзаллар ва ҳар хил турдаги аксессуарларни истеъмолчиларга таклиф этади.
Ҳозирда Ўзбекистонда UzTex, Samo, D.Maretti, TMT, Bonito,T-Sod ва шу каби кўплаб бошқа брендлар мавжуд. Бу мажмуада жойлашган брендлар айнан ўзбек моделер-дизайнерлари томонидан яратилган. Бу каби савдо мажмуларнинг Самарқанд, Бухоро, Хива ва Андижон шаҳарларида ҳам очилиши режалаштирилган.
Изоҳ (0)