Тошкент шаҳар давлат солиқ бошқармаси бошлиғига бириктирилган пойтахтнинг Чилонзор туманидаги 65 518 та хонадонлар ўрганилганда ва аҳоли билан юзма-юз мулоқотлар жараёнида фуқаролар томонидан кўтарилган 1127 та муаммоли масалаларга ечим топилди. Бу ҳақда Тошкент шаҳар давлат солиқ бошқармаси Жамоатчилик билан алоқалар ва ҳуқуқий ахборот бўлими хабар бермоқда.
Жойларда ўтказилган учрашувларда сектор раҳбарининг амалий кўмаги билан яшаш шароити оғир бўлган 6 та хонадоннинг уй-жойлари таъмирлаб якунига етказилди 25 та хонадонда эса таъмирлаш ишлари давом эттирилмоқда.
Ўзбекистонда ёш авлоднинг ҳар томонлама баркамол бўлиб улғайиши йўлида кўрсатилаётган чексиз ғамхўрликлар, уларни жисмонан соғлом, маънан етук инсонлар этиб улғайтириш муҳим масалалардан бири. Тўртинчи секторда бугунга келиб, 8 та болалар майдончаси қуриб фойдаланишга топширилди. Ҳозирда 12 та болалар майдончаси қурилиши якунланиш арафасида.
Бундан ташқари, ҳомийлар томонидан ҳудудда истиқомат қилувчи кам таъминланган ва ижтимоий ҳимояга муҳтож 34 нафар фуқарога ногиронлик аравачаси, 32 нафар фуқарога протез-ортопедия воситалари, эшитиш мосламалари, 363 нафар фуқарога бепул дори-дармон воситалари, 1192 нафар фуқаро озиқ-овқат маҳсулотлари, 80 нафар фуқарога зарурий маиший-техника жиҳозлари ва 447 нафар фуқарога моддий ёрдам пули ажратилишида амалий ёрдам кўрсатилди.
Тошкент шаҳар давлат солиқ хизмати органлари халқимизнинг эзгу анъаналарига амал қилинган ҳолда, кексалар, хаста ва ногиронлар ҳолидан хабар олиб, уларга қувонч улашмоқда. Жумладан, Ўзбекистон Республикаси кўзи ожизлар жамияти Тошкент шаҳар бўлими аъзолари ҳолидан хабар олди.
Мустақилликнинг 27 йиллиги муносабати билан 300 нафарга яқин кўзи ожизлар учун хайрия тадбири ташкил этилиб, улар учун байрам дастурхони ёзилди.
«Кўнгли ярим инсонлар ҳолидан хабар олишдек хайрли ва савобли иш бўлмаса керак. Тадбир иштирокчилари инсон қадри улуғ бўлган юртда яшаётганини яна бир бор ҳис қилишди. Бунинг учун, аввало муҳтарам Президентимизга ҳамда ташкилотчиларга алоҳида миннатдорчилик билдирамиз», – дейди Ўзбекистон Республикаси кўзи ожизлар жамияти Тошкент шаҳар бўлими раиси Рустам Асқаров.
Тошкент шаҳар давлат солиқ бошқармаси бошлиғи хайрия тадбирида иштирок эта олмаган кўзи ожизлар жамиятининг 50 нафар аъзоларининг хонадонларига ташриф буюрди. Улар ҳолидан хабар олиб, байрамона таом ва совға саломлар улашди.
Хайрия тадбирида санъаткорларнинг чиқишлари иштирокчиларга кўтаринки кайфият улашиб, байрам кечаси ҳақиқий шодиёнага айланди.
Изоҳ (0)