5 сентябрь куни «Ўзбекистон» халқаро форумлар саройида Ўзбекистон ёшлар симфоник оркестри билан ҳамкорликда британиялик машҳур скрипкачи Ванесса Мэйнинг концерти бўлиб ўтди. Ижтимоий тармоқларда Ўзбекистон оркестри ва скрипкачининг ўзига ҳам қаратилган «бирор марта ҳам репетиция қилинмаганлиги ва фонограммадан фойдаланганлиги» ҳақидаги айбловлар пайдо бўлди. Ўзбекистон ёшлар симфоник оркестри Facebook’даги саҳифасида ушбу гап-сўзларга нуқта қўйиш учун пост эълон қилди ва Ванесса Мэйнинг концерти жонли ўтганини маълум қилди.
Таъкидланишича, оркестр Ванесса Мэй концерт дастурига бир ойдан зиёдроқ тайёргарлик кўрган. Аммо айнан шоу куни бўлиб ўтиши керак бўлган ягона умумий репетиция техник муаммолар туфайли амалга ошмай қолган, шунингдек, солист концерт чоғида баъзи композицияларнинг аввалдан келишилган қисқа версияларини эмас, тўлиқ версияларини ижро эта бошлаган. Буларнинг барчаси оркестр ҳамда Ванесса Мэйнинг чолғучилари ижроси ўртасида фарқлар юзага келишига сабаб бўлган.
Бундан ташқари, концертда экзотик мусиқий асбоблар, электрон товушлар, табиатдаги ҳодисаларни ифодаловчи қўшимча товушлар каби на оркестр, на Ванесса Мэйнинг гуруҳи томонидан ижро этила олмайдиган мусиқий элементлардан иборат ёзиб олинган треклардан фойдаланилган. Аммо бу фонограмма ҳисобланмайди, шунингдек, Ванесса Мэйнинг дунёнинг бошқа бурчакларидаги шоуларида ҳам қўлланилади.
Ўзбекистон ёшлар симфоник оркестри қуруқ далиллар билан чекланиб қолмасдан, оркестрнинг ушбу концерт дастури учун репетициясидан лавҳаларни ҳам тақдим этишни ваъда қилди (Facebook’ка кириш билан боғлиқ муаммолар туфайли, видеони постга илова қилиша олмаган).
Изоҳ (0)