5-sentabr kuni “O‘zbekiston” xalqaro forumlar saroyida O‘zbekiston yoshlar simfonik orkestri bilan hamkorlikda britaniyalik mashhur skripkachi Vanessa Meyning konserti bo‘lib o‘tdi. Ijtimoiy tarmoqlarda O‘zbekiston orkestri va skripkachining o‘ziga ham qaratilgan “biror marta ham repetitsiya qilinmaganligi va fonogrammadan foydalanganligi” haqidagi ayblovlar paydo bo‘ldi. O‘zbekiston yoshlar simfonik orkestri Facebook’dagi sahifasida ushbu gap-so‘zlarga nuqta qo‘yish uchun post e’lon qildi va Vanessa Meyning konserti jonli o‘tganini ma’lum qildi.
Ta’kidlanishicha, orkestr Vanessa Mey konsert dasturiga bir oydan ziyodroq tayyorgarlik ko‘rgan. Ammo aynan shou kuni bo‘lib o‘tishi kerak bo‘lgan yagona umumiy repetitsiya texnik muammolar tufayli amalga oshmay qolgan, shuningdek, solist konsert chog‘ida ba’zi kompozitsiyalarning avvaldan kelishilgan qisqa versiyalarini emas, to‘liq versiyalarini ijro eta boshlagan. Bularning barchasi orkestr hamda Vanessa Meyning cholg‘uchilari ijrosi o‘rtasida farqlar yuzaga kelishiga sabab bo‘lgan.
Bundan tashqari, konsertda ekzotik musiqiy asboblar, elektron tovushlar, tabiatdagi hodisalarni ifodalovchi qo‘shimcha tovushlar kabi na orkestr, na Vanessa Meyning guruhi tomonidan ijro etila olmaydigan musiqiy elementlardan iborat yozib olingan treklardan foydalanilgan. Ammo bu fonogramma hisoblanmaydi, shuningdek, Vanessa Meyning dunyoning boshqa burchaklaridagi shoularida ham qo‘llaniladi.
O‘zbekiston yoshlar simfonik orkestri quruq dalillar bilan cheklanib qolmasdan, orkestrning ushbu konsert dasturi uchun repetitsiyasidan lavhalarni ham taqdim etishni va’da qildi (Facebook’ka kirish bilan bog‘liq muammolar tufayli, videoni postga ilova qilisha olmagan).
Izoh (0)