6 сентябрда Адлия вазирлиги ҳамда дунёдаги етакчи халқаро юридик компаниялардан бири саналган Ҳоган Ловеллс компанияси ўртасида имзоланган ўзаро англашув меморандуми доирасида халқаро тижорат арбитражи масаласи бўйича амалий семинар ўтказилди. Бу ҳақда Адлия вазирлиги матбуот хизмати хабар бермоқда.
Тадбирда давлат ва хўжалик бошқаруви органларининг ташқи иқтисодий ва инвестицион фаолият соҳасидаги мутахассислари, адвокатлар, ҳуқуқни муҳофаза қилувчи органлар ва бошқа ташкилотлар ходимлари иштирок этишди.
Тадбир очилишида адлия вазири ўринбосари – Тошкент давлат юридик университети ректори Есемурат Канязов сўзга чиқиб, мамлакат тараққиётининг жорий босқичида халқаро тижорат низоларини, хусусан халқаро тижорат арбитражларида ҳал этиш алоҳида долзарблик касб этаётганлигини, бу эса давлат ва хўжалик бошқаруви органлари масъул ходимларининг халқаро тижорат низоларини ҳал қилиш борасидаги билим ва кўникмаларини мустаҳкамлаш зарурати юзага келаётганлигини таъкидлади.
Тадбир доирасида халқаро даражадаги етакчи мутахассислар, Ҳоган Ловеллс компанияси ҳамкорлари Майкл Дейвисон, Алексей Дудко ва Дженнифер Смит ўзларининг арбитраж муҳокамасига тайёргарлик кўриш, арбитражни самарали олиб бориш ҳамда хорижда активларни излаб топиш ва ижрога қаратиш борасидаги тажрибалари билан ўртоқлашди.
Мазкур масалалар арбитраж низоларидаги энг мураккаб масалалардан бири саналади ҳамда арбитраж муҳокамаси томонининг манфаатларини ифодалашда жуда муҳим жиҳат ҳисобланади.
Таъкидлаш жоизки, Адлия вазирлиги томонидан ўтказилаётган бу каби тадбирлар мутахассисларнинг халқаро тижорат низоларини ҳал қилиш ҳамда Ўзбекистон ва унинг субъектлари манфаатларини халқаро миқёсда ҳимоялаш даражасини ошишига хизмат қилади.
Изоҳ (0)