Фарғонада микровтобус иштирокидаги ЙТҲда 10 киши жабрланди. Айни пайтда шифоҳонада фақат бир фуқаро қолмоқда

Бешариқ туманида жорий йил 29 август куни соат 06:30 атрофида М.Жумаев (исм-шариф шартли) бошқарувидаги қайта жиҳозланган, 15 ўринли Mercedes-Benz микроавтобуси «Товул—Бешариқ» йўналишида ҳаракатланаётиб, ҳайдовчи бошқарувни йўқотиши оқибатида зовурга тушиб, дарахтга урилди. Бу ҳақда «Дарё»га Фарғона вилоят ИИБ матбуот хизмати маълум қилди.

Машинасалонида бўлган 10 йўловчининг 4 нафари турли даражадаги тан жароҳатлари билан шифохонага ётқизилди. Қолган 6 нафарига тиббий ёрдам кўрсатилиб, хонадонларига қайтишга рухсат берилган. Айни пайтда шифоҳонада фақат бир фуқаро қолмоқда.

Ҳозирда мазкур ҳолат юзасидан тергов-суриштирув ишлари олиб борилмоқда.

Айрим ахборот воситалари орқали ҳодиса юзасидан бошқа маълумот тарқатилди. Ана шундай хабарларнинг бирида Бешариқ туманидаги воқеа жабрланувчилари 40 нафар қилиб кўрсатилган. Автобус ҳалокатга учраши оқибатида камида 7 киши оғир аҳволда шошилинч тез тиббий ёрдам бўлимига ётқизилганлиги келтирилган.

ИИБ матбуот хизмати бу рақамлар ҳақиқатга мутлақо тўғри келмаслигини билдирган. Ҳайдовчиларни ўзбошимчалик билан автомобилни қайта жиҳозлаш, ноқонуний тарзда йўловчи ташиш билан шуғулланиш, йўл ҳаракати қоидаларига беписанд муомалада бўлишдан тийилишга чақирган.