Рашиджон Қодиров иши: Алишер Ҳодиев ҳибсдан озод этилди

Собиқ бош прокурор Рашиджон Қодировга нисбатан очилган жиноят иши бўйича гумонланувчи тадбиркор Алишер Ҳодиев Испанияда Ўзбекистон Бош прокуратураси қарори асосида ҳибсдан озод этилди, деб ёзади «Газета.uz» ҳуқуқ-тартибот органларидаги манбасига таяниб.

Алишер Ҳодиев пул ювишда, фирибгарликда ва жиноий йўл билан топилган даромадларни қонунийлаштиришда айбланмоқда.

Маълум бўлишича, у кўнгилли равишда Испаниядан Ўзбекистонга қайтиб, тергов билан ҳамкорлик қилишга, давлатга келтирилган моддий зарарни қоплашга рози бўлган. Шу билан биргаликда Ҳодиевга нисбатан илгари сурилган айбловлар олиб ташланмаган — у ҳамон ўзига қарши илгари сурилган пунктлар бўйича айбланувчи ҳисобланади.

Иқтисодий ишлар бўйича катта эътибор айбланувчилар томонидан зарарнинг қопланишига қаратилиши туфайли, 40 ёшли тадбиркорга Ўзбекистонга кўнгилли равишда келиб, тергов ҳаракатларида қатнашиш имконияти берилди.

Алишер Ҳодиев шу йилнинг мартида Ўзбекистон Бош прокуратураси сўрови билан Барселонада ҳибсга олинган эди. 17 июнь куни Мадрид суди халқаро қидирувда бўлган Ҳодиевни Ўзбекистонга экстрадиция қилиш ҳақида қарор чиқарди. Аммо 7 август куни Испания суди экстрадиция ҳақидаги қарорни бекор қилди, чунки бу мамлакат Бош прокуратураси уни қидирилаётган шахслар рўйхатидан чиқарган эди.

Рашиджон Қодиров 2000—2015 йилларда Ўзбекистон бош прокурори бўлган, 2015—2017 йилларда эса у конституциявий суд судьяси этиб тайинланган.

Ўзбекистон Республикаси бош прокуратураси шу йилнинг февраль ойида Рашиджон Қодировга нисбатан жиноят иши қўзғатилганини маълум қилган эди.

У «Товламачилик», «Ҳокимият ёки мансаб ваколатини суиистеъмол қилиш», «Пора олиш» моддалари бўйича айбланмоқда.