Ўзбекистон Миллий матбуот марказида ҳарбий хизматчилар фарзандларининг олий таълим муассасаларига ўқишга кириши учун ажратилган квоталар ва ушбу квота асосида талабаликка қабул қилинганлар бўйича анжуманда маълумот берилди. Бу ҳақда Мудофаа вазирлиги матбуот хизмат хабар берди.
Эслатиб ўтамиз, 2018 йилнинг 14 май куни Ўзбекистон Президентининг «Ўзбекистон Республикаси Қуролли Кучлари ҳарбийлари ва уларнинг оила аъзоларини ижтимоий қўллаб-қувватлашга оид қўшимча чора-тадбирлар тўғрисидаги» ги қарори имзоланганди.
Матбуот анжуманида таъкидланишича, юқоридаги қарорга мувофиқ 2018 йил олий таълим муассасаларига ўқишга кириши учун Мудофаа вазирлиги қўшинларида жанговар хизматда ва илмий фаолиятда муайян натижаларга эришган ҳақиқий хизматни ўтаётган офицерлар, сержантлар ва оддий аскарлар таркибига мансуб бўлган, контракт бўйича ҳарбий хизматчиларнинг фарзандларига 631 та тавсияномалар берилган.
Шунингдек, хизмат вазифаларини бажариш чоғида ҳалок бўлган ҳамда ҳарбий хизмат вазифаларини бажариш чоғида ярадорлик, контузия, шикаст олиш ёки касалликлар оқибатида ногирон бўлиб қолган ҳарбий хизматчиларнинг 58 нафар фарзандларига ҳам тавсияномалар тақдим этилган.
Жами 689 нафар ҳарбий хизматчиларнинг фарзандларига тавсияномалар берилган бўлиб, улардан 357 нафари (яъни берилган умумий тавсияномаларнинг 52 фоизи) ўқишга кирганлиги маълум қилинди.
Изоҳ (0)