Бухоро вилоятининг туристик логотипини яратиш бўйича танлов эълон қилинди

Бухоро вилояти туризмни ривожлантириш департаменти томонидан вилоят логотипини яратиш бўйича танлов эълон қилинди. Бу ҳақда Туризмни ривожлантириш қўмитаси матбуот хизмати хабар бермоқда.

«Сиз ўзингизни иқтидорли дизайнер деб ўйлайсизми? Унда Бухоро вилояти туристик логотипини яратиш бўйича кўрик-танловга марҳамат!

Кўрик танлов 2018 йилнинг 18 августидан 10 сентябригача давом этади ва ‘Энг яхши туристик логотип’ номинацияси бўйича лойиҳалар ушбу муддатда қабул қилинади.

Бухоро вилоятининг туристик логотипини яратиб пул мукофотлари ёки қимматбаҳо совғага эга бўлинг!», — дейилади хабарда.

«Энг яхши туристик логотип» номинацияси бўйича лойиҳаларни саралаш қуйидаги талаблар асосида аниқланади:

1. Бухоро вилоятнинг туристик логотипи ўзининг алоҳида ташқи кўриниши ва мазмунига эга бўлишиҳамда вилоятда туризм инфратузилмасини ва туризмнинг ривожланиши тенденциясини ўзида акс эттириши;
2. Бухоро вилоятнинг туристик логотипи вилоятда туризмни ривожлантиришнинг янги йўналишларини қамраб олиши лозим.

Ҳакамлар ҳайъати аъзолари туризм соҳасида фаолият юритувчи мутахассислар ҳамда тарих, адабиёт фанлари проффесорларидан танланади. Бухоро вилоятининг туристик логотипини ишлаб чиқиш бўйича кўрик-танлов иштирокчилари рўйхати вилоят ишчи гуруҳи томонидан тузилади.

Ҳар бир иштирокчи ёки ғоя муаллифи томонидан бир нечта лойиҳалар тақдим этилиши мумкин. Танловда аризаларни топшириш ва тақдимот қилиш иштирокчининг шахсан ўзи томонидан амалга оширилади.

Танлов шартлари билан тўлиқ ҳолда қўмита сайтида танишиш мумкин.