Сурхондарёда йилига 1,5 млн тонна цемент ишлаб чиқарадиган янги завод ишга туширилди

Сурхондарё вилоятининг Шеробод туманида янги цемент заводи ишга туширилди. Бу ҳақда «Халқ сўзи« хабар бермоқда.

«Олмалиқ кон-металлургия комбинати» акциядорлик жамияти томонидан бунёд этилган заводнинг технологик қисмини Туркиянинг Dal texnik makina tigaret ve sanayi фирмаси амалга оширди.

Ушбу инвестицион лойиҳани амалга ошириш учун айнан Шеробод тумани танлангани бежизга эмас. Бу ерда улкан хом ашё захирасига эга цемент, оҳактош ва тупроқ (глина) конлари мавжуд. Мазкур лойиҳанинг умумий қиймати 212,8 миллион долларни ташкил этиб, корхонада йилига 1,5 миллон тонна сифатли портланд цемент ишлаб чиқарилади. Эндиликда 1200 нафар маҳаллий аҳоли доимий иш таъминланади.

Корхонада ишлаб чиқариладиган юқори сифатли цемент маҳсулотлари нафақат ички бозорда сотилади, балки маълум қисми қўшни Афғонистонга экспорт қилиниши ҳам кўзда тутилмоқда.

«Ўзқурилишматериаллари» акциядорлик жамияти маълумотига кўра, ҳозирда мамлакатдаги та 14 та цемент ишлаб чиқарувчи корхона томонидан 9,1 миллион тонна маҳсулот ишлаб чиқарилмоқда. Жорий йил якунига қадар 3 миллион тоннадан зиёд бўлган 8 та, келгуси йилда ишлаб чиқариш қуввати 4,7 миллион тонна бўлган яна 9 та лойиҳа амалга оширилади.