Қурбон ҳайити муносабати билан Мудофаа вазирлиги тизимида мустақиллик йилларида ўз хизмат вазифасини бажариш вақтида ҳалок бўлган ҳарбий хизматчиларнинг оилаларидан хабар олинди. Бу ҳақда вазирлик матбуот хизмати «Дарё»га маълум қилди
Жумладан, Мудофаа вазирлиги марказий аппарати масъуллари, Марказий, Тошкент, Шарқий, Шимоли-ғарбий ва Жануби-ғарбий махсус ҳарбий округлари қўмондонликлари, вилоят мудофаа ишлари бошқармалари, ҳарбий қисм ва жамоат вакиллари билан биргаликда ўз жонини Ватан тинчлиги йўлида фидо этган қаҳрамонларнинг оилалари билан суҳбатлар уюштирди. Уларга моддий ва маънавий ёрдам кўрсатилди.
Шаҳар ва туман ҳокимликлари, хотин-қизлар қўмиталари, Ўзбекистон ёшлар иттифоқи, «Маҳалла» жамғармаси ҳамда мактабгача таълим бўлимлари билан ҳамкорликда сценарийлар тузилди ва хонадонларда хотира тадбирлари ташкил этилди.
Хусусан, Бухоро гарнизонида жойлашган ҳарбий қисм ҳарбий хизматчилари ва хизмат бурчини бажариш вақтида вафот этган ҳарбий хизматчиларнинг яқинлари билан «Ватан фидойи фарзандларини унутмайди!» мавзусида Бухоро вилояти Ёшлар марказида маънавий-маърифий тадбир ўтказилди.
Марҳум ҳарбийлар хонадонларига қилган ташрифлар марҳумлар оила аъзоларини кўнглини тоғдек кўтарган бўлса, ташрифдан хабар топган маҳалла фаоллари, марҳумлар яқинлари ва иқтидорли ёшлар учун яна бир тарбия мактабини ўтади, дейилади вазирлик хабарида.
Изоҳ (0)