Тошкент шаҳрида 16 август куни Ўзбекистон – Тожикистон бизнес-форуми бўлиб ўтди. Унда икки мамлакатнинг савдо, саноат, иқтисодиёт, банк-молия, туризм саноати, электр энергияси, қурилиш, кимё саноати, машинасозлик, металлургия, автомобилсозлик, электр техникаси, транспорт-логистика, қишлоқ хўжалиги, озиқ-овқат, тўқимачилик ва енгил саноат, фармацевтика каби соҳаларга ихтисослашган вазирлик, компания ва фирмаларининг 400 дан зиёд вакиллари иштирок этди. Бу ҳақда ЎзА хабар берди.
Президент Шавкат Мирзиёевнинг шу йил 9—10 март кунлари Тожикистон Республикасига давлат ташрифи икки томонлама алоқалар ривожида янги саҳифа очди. Унда икки мамлакат ўртасида савдо-иқтисодий, маданий алоқаларни ривожлантириш юзасидан муҳим келишувларга эришилган эди. Шунга мувофиқ, ўтган қисқа вақт мобайнида икки мамлакат ишбилармон доира вакилларининг ўзаро мулоқотини ташкил қилиш, қўшма лойиҳаларни амалга оширишларига кўмаклашиш мақсадида турли даражадаги бизнес-форумлар, саноат маҳсулотлари кўргазмаси, ярамаркалар ташкил этилди.
Таъкидлаш ўринли, бу каби учрашув ва мулоқотларни ташкил этишдан мақсад икки давлат тадбиркорлари ўртасида кооперация алоқаларини мустаҳкамлаш, мамлакатларнинг умумий транспорт-коммуникациявий, савдо-иқтисодий имконияти ва салоҳиятидан тўлақонли фойдаланиш орқали товар айланмаси ҳажмини сезиларли ошириш, қўшма лойиҳалар доирасида саноат маҳсулотлари ишлаб чиқариш орқали учинчи мамлакат бозори томон йўл топишдан иборат.
Форум доирасида меҳмонларга Ўзбекистонда ишлаб чиқаришни эркинлаштириш, фармацевтика саноатини янада ривожлантириш, эркин ва кичик саноат зоналари, уларда инвесторлар учун яратилган солиқ имтиёзлари ва бошқа қулайликлар ҳақида сўзлаб берилди. Тожикистон қурилиш, туризм, транспорт-логистика соҳаси вакиллари Ўзбекистоннинг шу соҳадаги салоҳияти билан таништирилди. Шунингдек, икки мамлакат инвесторлари учун яратилаётган қулайликлар, ишлаб чиқарилаётган маҳсулотлар, тақдим этилаётган имтиёзлар ҳақида муҳим маълумотлар берилди ҳамда мавжуд иқтисодий имкониятлар тақдимоти ўтказилди.
Бугунги кунда давлатларнинг савдо-иқтисодий ҳамкорлиги янги суръатларда ривожланмоқда. Жорий йилнинг биринчи ярмида ўзаро товар айирбошлаш ҳажми 35 фоиз ўсди. Ўзбекистондан Тожикистонга енгил автомобиллар, юк машиналари, қишлоқ хўжалиги техникалари, металлургия, электротехника, қурилиш моллари, озиқ-овқат ва тўқимачилик саноати маҳсулотлари экспорт қилинаётган бўлса, Тожикистон Ўзбекистонга қурилиш материаллари, цемент, алюмин каби маҳсулотларни етказиб бермоқда.
Анжуманда таъкидланганидек, савдо-иқтисодий, сармоявий соҳалардаги ҳамкорлик суръатларида сезиларли ўсиш қайд этилаётган бўлса-да, бу мавжуд имконияларга тўлиқ мос келмайди. Шу маънода, бугун давлатлар ўртасидаги савдо айланмасини 2020 йилгача 500 миллион долларга етказиш белгиланган. Бунинг учун барча зарур имкониятлар мавжуд. Мамлакатларнинг жўғрофий жойлашуви, инвестицияларни ҳимоя қилиш бўйича ўзаро келишувлар, солиқ юкини енгиллаштиришдаги ҳамкорлик, умумий чегаралар, эркин савдо тартиби ва минтақа мамлакатларининг ягона транспорт-коммуникация, транзит-логистика имкониятлари шулар жумласидан.
Бизнес-форум давомида молиявий ҳамкорлик, транзит, электроника, фармацевтика, қандолатчилик маҳсулотлари экспорт-импортига оид умумий қиймати 103,3 миллион долларлик шартномалар имзоланди.
Изоҳ (0)