Ўзбекистон Республикаси Президентининг 2018 йил 6 апрелдаги «Халқаро мақом санъати анжуманини ўтказиш тўғрисида»ги қарори ижросини таъминлаш мақсадида 2018 йилнинг 7 август куни Ташкилий қўмита йиғилиши бўлиб ўтди. Бу ҳақда Ўзбекистон матбуот ва ахборот агентлиги хабар берди.
Ташкилий қўмита йиғилишида Ўзбекистон Матбуот ва ахборот агентлиги, Ўзбекистон миллий ахборот агентлиги, Ўзбекистон миллий телерадиокомпанияси, «Дунё» ахборот агентлиги ҳамда бошқа оммавий ахборот воситалари вакиллари иштирокида Халқаро мақом санъат анжумани матбуот маркази фаолиятини йўлга қўйишга қарор қилинди.
Халқаро мақом анжумани Матбуот маркази:
– анжуманни кенг ёритиш бўйича медиа-режа ишлаб чиқади ва амалга татбиқ этади;
– анжуман ҳамда унинг доирасида ўтказиладиган халқаро конференцияга тайёргарлик жараёни ва фаолиятини кенг ёритади;
– интернет тармоқларида анжуман ва миллий мақом санъати ривожига оид маълумотларни жойлаштиради ва мунтазам бойитиб боради;
– анжуман ҳақида хорижий ОАВни хабардор қилиб, анжуманни ёритиш истагида бўлган ОАВ ходимларига таклифномалар жўнатади ва уларни ўрнатилган тартибда рўйхатга олади;
– анжуман ва унинг доирасидаги барча тадбирларни ОАВда кенг ва батафсил ёритиб боради.
Матбуот маркази фаолиятини тезкорлик билан ташкил қилиш, ОАВни анжуман ва мавзуга оид материаллар билан таъминлаб бориш мақсадида анжуманнинг www.maqomfourm.uz расмий сайти, Telegram ижтимоий тармоғида Press Centre Maqom гуруҳи ташкил этилди.
Бугунги кунда Шаҳрисабз шаҳрида журналистларнинг фаолият юритишлари учун барча шарт-шароитларга эга Матбуот маркази фаолиятини йўлга қўйиш бўйича зарур чоралар кўрилмоқда. Албатта, бу жараённинг янада самарали бўлишини таъминлашда оммавий ахборот воситалари вакилларининг фаол иштироки талаб этилади. Шунинг учун ҳам Матбуот маркази барча ОАВни ҳамкорликка чорлайди.
2018 йилнинг 6—10 сентябрь кунлари Қашқадарё вилояти Шаҳрисабз шаҳрида илк маротаба ўтказиладиган «Халқаро мақом санъати анжумани»да иштирок этиш учун жорий йилнинг 19 июль ҳолатига дунёнинг 15 га яқин давлатлари ижодий жамоалари ва яккахон хонандаларидан аризалар келиб тушган ҳақида маълумот берган эдик.
Изоҳ (0)