Хорватияни ЖЧ—2018 финалига олиб чиққан Златко Далич термадаги фаолияти борасида бир қарорга келди

Хорватия термаси бош мураббийи Златко Далич жамоада ишлашда давом этади. Бу ҳақда Хорватия футбол уюшмаси матбуот хизмати маълум қилди.

Бундай қарорга томонлар 9 августдаги учрашувдан сўнг келган.  Қайд этилишича, Златко Далич мамлакат футбол уюшмаси президенти Давор Шукер билан кўришган. Келаси ҳафтада 51 ёшли Далич янги шартномага қўл қўйиши кутилмоқда.

«Барча масалалар бўйича мамлакат футбол уюшмаси президенти билан очиқ гаплашиб олиш муҳим эди. Мен тўғри деб ҳисобламаган ҳолатларда ҳам каминани тушуна олган Шукерга раҳмат айтаман. Биз барча муаммоларни ҳал қилдик. Сабрсизлик билан янги чақирувларни кутмоқдаман»,—дейди Златко.

Маълумот учун мазкур мураббий қўл остида Хорватия термаси Россиядаги ЖЧ—2018 финалига қадар етиб борди, ҳал қилувчи баҳсда эса французларга 4:2 ҳисобида енгилди.