«Ўзбекистонга кўп эмас, кам сонли ва замонавий армия керак», — бу фикрни 3 август, жума куни Сенатнинг мудофаа ва хавфсизлик масалалари қўмитаси ҳисоботи вақтида қўмита аъзоси Бойматжон Расулов илгари сурди. Бу ҳақда «Газета.uz» хабар бермоқда.
— Ўзбекистон айни вақтда профессионал ва кам сонли армияни шакллантирмоқда. Ҳарбий доктринага мувофиқ, Ўзбекистон — тинчликпарвар мамлакат. Шунинг учун ҳам, армиянинг сони мамлакат ички хавфсизлигини таъминлаш учун етарли бўлса, шуни ўзи кифоя қилади.
Июль ойи бошида қўмита хизматга чақириқ ёшини 27 эмас, 25 ёш деб белгилаш ҳақида Бош вазирга парламент сўровини юборган. Вазирлар Маҳкамаси октябрь ойида сўровга жавоб беради.
— Чақириқ комиссиялари саралаш ўтказади ва бу жуда яхши, негаки барча йигитларни ҳарбий хизматга жалб қилишнинг иложи йўқ. Чақириқ ёшини 25 ёш деб белгилаш орқали биз армияда хизмат қилаётганлар сонини камайтирмоқчимиз, — дейди Бойматжон Расулов.
Сенаторнинг маълум қилишича, мудофаа ишлари бошқармаларидан маълумотнома олиш бекор қилинади. Хусусан, давлат идоралари томонидан ишга жойлашиш, таълим муассасасига қабул қилиш, пенсия тайинлаш, паспорт олиш ва бошқа ҳолатларда фуқаролардан ҳарбий билет ёки ҳарбий қисмда ҳисобда турганлик гувоҳномасини талаб қилиш тартибига барҳам берилади.
Қўмитанинг Бош вазирга юборган сўровига кўра, фуқаролардан мудофаа ишлари бошқармалари берадиган маълумотномани талаб қилишга чек қўйилади. Шунингдек, сўровда 2019 йил 1 январь ойидан бошлаб ҳарбий хизмат билан боғлиқ ҳужжатларни тақдим қилишни Давлат хизматлари агентлигига топшириш таклиф қилинган. Ҳукумат ташаббусни қўллаб-қувватлаган.
— Эндиликда талаба ва бошқа ҳарбий мажбурияти бор кишилар мудофаа ишлари бошқармаларига маълумотнома олиш учун бориб юрмайди, — дейди Бойматжон Расулов.
Изоҳ (0)