АҚШ ва Шимолий Корея ўртасидаги келишувларга мувофиқ, КХДР етакчиси Ким Чен Ин якуний ядросизланиш муддатларини ўзи белгилайди. Бу ҳақда Сингапурда ASEAN саммитида бўлиб турган АҚШ давлат котиби Майк Помпео маълум қилди, деб ёзади «Корреспондент.net».
«Ядросизланишнинг якуний муддатлари раис Ким томонидан белгиланади, ҳеч бўлмаганида қисман. Бу унинг қарори», — деди Помпео.
Шу билан бирга, давлат департаменти раҳбари таъкидлашича, Вашингтон ва Пхеньян алоқаларидаги прогрессга қарамай, КХДРга нисбатан халқаро санкциялар Корея ярим ороли тўлиқ ядросизлангунича сақланиб қолади.
«Барча мамлакатлар БМТ Хавфсизлик кенгаши резолюциясини қўллаб-қувватлади, ушбу санкциялар Шимолий Кореянинг тўлиқ ядросизланишига эришмагунимизча сақланади. Қандай прогрессга эришганимиздан қатъи назар, ҳозирча бу санкциялар қолади», — деди Помпео.
Шунингдек, давлат котиби КХДР ҳукумати 1950—1953 йиллардаги Корея урушида ҳалок бўлган америкалик ҳарбий хизматчилар жасадларини топшириш бўйича келишувни бажарганидан кейин, Пхеньян билан алоқалар яхшиланишига умид билдирди.
Изоҳ (0)