Аргентина ҳукумати тепасида Кристина Фернандес де Киршнер ва унинг турмуш ўртоғи Нестор Киршнер бўлган даврда ҳайдовчи Оскар Сентано 2003 йилдан 2015 йилга қадар ён дафтарига пора билан боғлиқ маълумотларни қайд қилиб борган, деб ёзади TJournal.
Ҳукумат амалдори ҳайдовчиси бўлган Сентено ташиган пораларнинг олинган вақти, миқдори ва ҳаттоки пуллар бўлган сумкаларнинг вазнини ҳам ёзиб борган. У, шунингдек, олиб борилган жойлар ва бошқа кўплаб тафсилотларни ҳам қайд этган. Масалан, бошлиғининг спорт залига борганини.
2018 йил бошида Сентено 8 та дафтарни La Nacion газетасига топширади. Дафтарларни топширишдан олдин эса у воқеалар баёни устида бир неча ой ишлаган.
1 август санасида эса нашр кўплаб ҳибсларга олиб келган тергов ишини эълон қилди.
Журналистлар ҳисоб-китобига кўра унинг ён дафтарида 56 миллион доллар пора ҳақида гап боради. Судьялар фикрига кўра эса пораларнинг умумий миқдори 160 миллион долларни ташкил қилади.
Сентено ҳибсга олинганидан сўнг тергов билан ҳамкорлик қила бошлайди. Кўрсатма беришдан бош тортган кўплаб амалдорлар ва тадбиркорлар айнан шу ён дафтар туфайли қўлга олинди. Мазкур ишда қурилиш компанияси раҳбари Хавьер Кабальеро, шунингдек, Энергетика компанияси вице-президентлари Херардо Фeррeйра ва Хорхе Гилермо Нейра номлари ҳам қайд этилган.
Bloomberg нашри эса «энг муҳим савол» сифатида мазкур иш Кристина Кришнерни ҳибсга олинишига олиб келиши ёки олинмаслигида деб таъкидлайди. Агар у ҳибсга олинадиган бўлса, 2019 йилдаги президентлик сайловларида қатнашиши сўроқ остида қолади. Пора иши бўйича суд Киршнерни дахлсизлик ҳуқуқидан маҳрум этишни талаб қилмоқда.
Изоҳ (0)