«Ал-Қоида» террорчилик гуруҳининг асосчиси ва етакчиси Усама бен Ладеннинг онаси Алия Ганем Британиянинг The Guardian газетасига илк бор интервью берди.
Ҳозир у Саудия Арабистони ғарбида жойлашган Жидда шаҳридаги ҳашаматли уйда Усаманинг укалари — Аҳмад, Ҳасан ва иккинчи турмуш ўртоғи Муҳаммад Ал-Аттас билан бирга яшайди.
11 сентябрь воқеаларидан сўнг деярли 17 йил ўтди, Усама бен Ладеннинг оиласи эса ҳамон Саудия жамиятининг нуфузли қисми бўлиб турибди.
«Ҳаётим ўта қийин кечди, чунки у мендан олисда эди. У жуда яхши бола эди, мени жуда яхши кўрарди», дейди онаси. Алия Ганемнинг айтишича, Усамани уч ёшидан бошлаб иккинчи эри катта қилган.
Газетанинг қайд этишича, Усама бен Ладен оиласи сулолавий қурилиш империясининг эгаси ҳисоблангани боис ҳамон подшоҳликнинг энг бой оилаларидан бири бўлиб турибди. Ҳозирги Саудия Арабистонидаги аксарият бино ва иншоотларни айнан улар қурган.
Кўп йиллар давомида Алия Ганем, унинг бутун оиласи каби, ўғлининг фаолияти ҳақида изоҳ беришни рад этиб келган. У Усама бен Ладен «Ал-Қоида» гуруҳига 20 йил давомида раҳбарлик қилганида, Нью-Йорк ва Вашингтонга зарбалар берилганда, шунингдек, Усама Покистонда ўлдирилганидан сўнг тўққиз йил давомида ҳеч қандай интервью бермаган.
Саудия давлатидаги энг нуфузли оилаларидан бирининг ҳаракатланиши ва ўзаро алоқалари жиддий кузатув остида қолмоқда. Шунинг учун интервью учун расмийлардан рухсат олиш талаб этилди. Бунга Саудия Арабистонининг 32 ёшли шаҳзодаси Муҳаммад бин Салмон розилик берди.
Саудия ҳукумати вакили иштирокида ўтказилган интервью вақтида Усама бен Ладеннинг оиласи ўзини эҳтиёткор тутди.
Она ўзининг тўнғичи — Усама бен Ладенни ўқишга иштиёқманд уятчан бола сифатида эслайди. Унинг айтишича, университетдагилар уни ўзгартирган ва у бошқа одамга айланган.
«У 20 ёшида, миясига ёт ғояларни сингдирган одамларни учратмасидан аввал жуда яхши бола эди. Улар ўз иши учун пул олган. Мен унга доимо улардан узоқроқ юришни айтардим. У ҳеч қачон менга нима қилаётганини айтмасди, чунки у мени жуда яхши кўрган», — дея эслайди Алия Ганем.
Онанинг айтишича, у университетда учратган одамлардан бири кейинчалик Саудия Арабистонидан сургун қилинган ва Усама бен Ладеннинг диний маслаҳатчисига айланган «Мусулмон биродарлар» ташкилоти аъзоси Абдулла Аъзам бўлган.
1980 йилларнинг бошларида Усама бен Ладен Афғонистонга жўнаб кетган.
Онанинг сўзларига кўра, у Усама жиҳодчи бўлишини ҳеч қачон хаёлига келтирмаган. Ўғли кимга айланганини тушунгач, қаттиқ ранжиган. Шунга қарамай, укаси Аҳмаднинг айтишича, онаси камдан-кам ҳолатларда акасига ҳаққоний баҳо берган.
«11 сентябрдан бери 17 йил ўтди, у ҳамон Усамани айблашдан бош тортмоқда. Бунинг ўрнига атрофдагиларни айблайди. У ‘яхши бола’нинг бу томонларини кўрмади», — дейди Аҳмад.
Аҳмаднинг сўзларига кўра, Нью-Йоркдан 11 сентябрь фожиаси ҳақида хабарлар кела бошлагач, у ушбу ишлар ортида уларнинг акаси Усама бўлганини билган.
«Мен қаттиқ таъсирландим. Бу ғалати туйғу эди. Биз дастлабки 48 соат ичида бу Усама эканлигини билгандик. Каттадан кичиккача барчамиз ундан уялардик. Ҳаммамиз бунинг оқибати яхшилик билан тугамаслигини билардик», — дейди Аҳмад.
Оила аъзоларининг сўзларига кўра, улар охирги бор Усама бен Ладенни 1999 йил Афғонистонда, Қандаҳор яқинидаги базада икки бор йўқлаганларида кўришган.
Изоҳ (0)