Ўзбекистон Профессионал футбол лигаси «Навбаҳор» футбол клуби фотомухбири Илҳом Иминовга 1 миллион сўм миқдорида жарима солди. Бу ҳақда ташкилот сайтида ахборот берилган.
Маълум бўлишича, «Навбаҳор» футбол клуби фотомухбири Илҳом Иминов Ўзбекистон Суперлигаси 20-тури учрашувлари доирасидаги «Нефтчи» (Фарғона) — «Навбаҳор» (Наманган) ўйини вақтида Фарғонадаги «Истиқлол» стадионнинг техник ҳудудида тамаки истеъмол қилган.
Фотомухбирнинг тамаки истеъмол қилаётгани ҳолати учрашув комиссари Жаҳонгир Раҳматуллаев томонидан қайд этилган. «Соғлом турмуш тарзи тарғиб этиладиган спорт тадбирлари вақтида стадион техник ҳудудида тамаки истеъмол қилиш ножоиздир», — дейилади ЎзПФЛ ахборотида.
Шу муносабат билан, ЎзПФЛ Мусобақалар регламентининг 3-қисми 3.9-банди ҳамда Интизомий ва жарималар кодексининг 2-қисм 5.37-бандига мувофиқ, «Навбаҳор» футбол клуби фотомухбири Илҳом Иминов 1 миллион сўм миқдорида жаримага тортилган.
Маълумот учун, «Нефтчи» ва «Навбаҳор» ўртасидаги учрашув 2:1 ҳисобида фарғоналиклар ғалабаси билан тугаган — бу «Нефтчи» учун мавсумдаги илк ғалаба бўлди. Ўйиндан сўнг «Нефтчи» футболчиси Абдураҳмон Абдулҳақов «Навбаҳор» мухлисларининг жиғига теккани учун 2 миллион сўм жаримага тортилган, мухлислари Абдулҳақовга турли буюмлар улоқтиргани учун «Навбаҳор» сўнгги бор огоҳлантирилган эди.
Изоҳ (0)