Тошкентда ўтказилган ўзбек-япон бизнес форуми доирасида бир қатор япониялик мутахассислар Инновацион ривожланиш вазирлигида бўлди. Делегация аъзоларини вазир Иброҳим Абдураҳмонов бошчилигидаги гуруҳ қабул қилди. Бу ҳақда «Дарё»га вазирлик матбуот хизмати хабар берди.
Учрашувда «Япония—Ўзбекистон Ипак йўли» жамғармасининг тиббиёт ва соғлиқни сақлаш масалалари бўйича ишчи гуруҳи раиси, Sakura Global Holding компанияси бошқарув кенгаши раиси Мацумото Кеничи, Paramount Bed компаниясининг халқаро масалалар бўйича вице-президенти Нодзаки Акихико, Кеё университети тиббиёт факультети профессори Осамуро Ёшиюки, шу университетнинг спорт тиббиёти илмий-тадқиқот маркази профессори Ишида Хироюки, Green Hospital Supply компанияси вице-президенти Кобаяши Хироюки, OMETA ассоциацияси вице-президенти Яно Муморова иштирок этди.
Япониялик делегация аъзолари малакали шифокорлар етишмаётган айни шароитда Ўзбекистонда телемедицина тизимини кенг татбиқ қилиш лозимлиги ҳақида таклиф берди. Шунингдек, Япония ва Ўзбекистондаги тиббий олий таълим муассасаларининг ҳамкорлигини йўлга қўйиш масаласи ҳам муҳокама қилинди. Тиббиётга доир инновацион технологияларни жорий этиш учун венчур компанияларини тузишга доир ҳужжатларни шакллантиришда япон томони ёрдам беришга тайёр экани айтилди.
Меҳмонларга вазирликда тиббиёт соҳасида амалга оширилаётган лойиҳалар, жумладан, Инновацион ривожланиш вазирлиги қошида халқаро стандартлардаги лаборатор ва илмий-амалий талабларга жавоб бера оладиган Молекуляр аллергология халқаро маркази ташкил этилаётгани, тез тиббий ёрдам тизимини такомиллаштириш чоралари амалга ошириш бўйича лойиҳа ишлаб чиқилаётгани ҳақида маълумот берилди.
Медицина соҳасига инновацион технологияларни татбиқ қилиш, шу соҳада ҳамкорликни йўлга қўйиш бўйича ишларни амалга ошириш учун делегация раҳбари жаноб Мацумото Кеничи тиббиёт ва соғлиқни сақлаш соҳасида Японияда ҳар ой ўтказиладиган кўргазмаларга вазирлик ходимларини таклиф қилди.
Изоҳ (0)