Андижоннинг Қорасув шаҳрида шаръий никоҳ билан яшаётган 18 оиланинг никоҳи расмийлаштирилди

Ўзбекистонда 1—25 август кунлари «Биз оилавий ажримларга қаршимиз» мавзусида оилавий муносабатларни мустаҳкамлаш ойлиги ўтказилмоқда.

Мазкур ойлик доирасида Андижон вилоятининг Қорасув шаҳрида олиб борилаётган ишлар хусусида шаҳар ҳокимининг ўринбосари, хотин-қизлар қўмитаси раиси Наргиза Холматова ЎзА мухбирига қуйидагиларни маълум қилди.

— Қорасув шаҳри қўшни Қирғизистон билан чегарадош чекка ҳудудларидан бири. Шаҳарда мавжуд 10 маҳалла фуқаролар йиғинида 9 мингдан ортиқ оилада 34 мингдан зиёд аҳоли истиқомат қилади.

Ойлик доирасида шаҳардаги нотинч, ажрим ёқасида турган, турли муаммолари бўлган оилаларни қайта хатловдан ўтказиш, мазкур оилаларда тинчлик-хотиржамлик, ижтимоий-маънавий муҳит барқарорлигини таъминлаш юзасидан чора-тадбирлар белгилаб олинган.

Нотинч оилалар билан олиб борилаётган ишлар ўз самарасини бермоқда. Кейинги икки ойда 34 нотинч, ажрим ёқасидан турган оилалардаги муаммолар бартараф этилди. Жорий йилнинг ўтган даврида шаръий никоҳ билан яшаётган оилалардан 18 тасининг никоҳи қонуний расмийлаштирилди.

Ноқонуний, эрта турмуш ва қариндошлар ўртасидаги никоҳлар, аёллар жиноятчилиги билан боғлиқ ҳолатларнинг олдини олиш юзасидан мана шундай ҳолатлар қайд этилган Пахтачи, Амир Темур маҳаллаларида тарғибот-тушунтириш ишлари кучайтирилмоқда. Бунинг самараси ўлароқ, аёллар жиноятчилиги ўтган йилнинг шу даврига нисбатан кескин камайди.

Шаҳримизда яшовчи К. исмли аёл ҳамшаҳарлари ишончини суиистеъмол қилиб, фирибгарлик йўли билан ўзгалар пулини ўзлаштиришга уриниб, жиноят содир этди. Тузилган ишчи гуруҳ томонидан ушбу ҳолат жойига бориб таҳлил қилинди, ҳолатни келтириб чиқарган омиллар ўрганилди. Жиноят содир этган аёл муҳокама қилиниб, унга нисбатан кенг жамоатчилик, маҳалланинг таъсир чоралари кўрилди.

Маҳаллаларда жиноятчилик, ўз жонига қасд қилиш, суицид ҳолатлари профилактикаси, оила билан боғлиқ қадим ва ўзига хос қадриятлар, эзгу урф-одат ва анъаналарни тарғиб этишга қаратилган ишларни олиб бориш юзасидан ҳам аниқ чоралар белгиланди. Хусусан, оилалар мустаҳкамлигига эришиш, бу борадаги илғор тажрибаларни оммалаштириш мақсадида «Энг яхши қайнона», «Энг намунали келин», «Ибратли қайнота» сингари танловлар, ёш келин-куёвлар, турмуш қуриш арафасидаги йигит-қизлар иштирокида давра суҳбатлари ўтказиб борилади.