Пастдарғом туманининг Илм қишлоғида ўтказилган вилоят Ички ишлар бошқармаси бошлиғи ҳамда туман раҳбарлари иштирокида сайёр қабул бўлиб ўтди. Бу ҳақда «Дарё» мухбири Фарҳод Норбўтаев хабар бермоқда.
Сайёр қабулда туманнинг Меҳнат, Илм, Беклар, Отарчи, Қўшқудуқ, Зормон, Санчиқул каби ўндан ортиқ қишлоқларининг фуқаролари ўзларини қийнаб келаётган муаммоларини баён этишди. Қирқ мингга яқин киши истиқомат қилаётган мазкур ҳудуд аҳолисидан тушган 130 га яқин мурожаатлар секторлар ҳамда ташкилот раҳбарлари, Халқ қабулхонаси вакиллари томонидан ўрганиб чиқилди. Ўттиздан ортиқ мурожаат шу ернинг ўзида ечим топди ва қолганлари ижобий ҳал этилиши учун мутасадди ташкилотларга юклатилди.
Вилоят ИИБ матбуот хизмати берган маълумотга кўра, мулоқот жараёнида тадбиркорликни ривожлантириш, янги иш ўринлари яратиш, кредит маблағлари ажратиш, газ, ичимлик суви масалалари, ички йўлларни таъмирлаш, қолаверса тиббиёт ва таълим соҳасида учраётган айрим камчиликларга эътибор қаратилган. Мурожаатларни ўз вақтида ва бекам-у кўст бажарилиши учун масъул шахсларга алоҳида топшириқлар берилган ва уларнинг ижроси назоратга олиниши билдирилган.
Шунингдек, Илм қишлоғида яшовчи кам таъминланган, моддий ёрдамга муҳтож ва 2 гуруҳ ногирони Ҳамдам Холмуродовнинг оиласи Пастдарғом туманига сектор раҳбари этиб бириктирилган вилоят ички ишлар бошқармаси бошлиғи, ҳамда туман раҳбарияти томонидан ўрганилди. Уй эгасига моддий ва маънавий ёрдам бериш юзасидан мутасаддиларга тегишли топшириқлар берилди.
Изоҳ (0)