Тошкент шаҳар ИИББ делегацияси Корея таклифига кўра, ушбу мамлакатга ташриф буюрди. Бу ҳақда Тошкент шаҳар ИИББ матбуот хизмати хабар бермоқда.
«Ташрифдан кўзланган мақсад ушбу мамлакат полицияси фаолиятини ўрганиш, тажриба алмашиш, жамоат тартибини сақлаш юзасидан ўзаро фикр алмашиш. Ташриф давомида ҳар икки мамлакат ички ишлар органлари вакилларининг қатор учрашувлари ўтказилиб, уларда ўзаро ҳамкорликни мустаҳкамлаш, яқин алоқаларни йўлга қўйиш ва шу орқали жиноятчиликка қарши курашиш, фуқаролар хавфсизлигини таъминлаш соҳасидаги истиқболдаги режалар муҳокама этилмоқда», — дейилади хабарда.
Ташриф мобайнида делегация аъзолари Корея Республикаси полицияси миллий агентлигида бўлиб, Бош комиссар жаноб Мин Габ Ренг билан музокара олиб борди. Унда икки дўст мамлакат ўртасида илиқ муносабатлар ўрнатилгани, уларни янада мустаҳкалшдан томонлар манфаатдор эканликлари қайд этилди. Шунингдек, Сеул шаҳри полиция агентлиги комиссари Ли Жу Мин билан ҳам учрашув бўлиб ўтди. Унда Тошкент шаҳар ИИББ вакилларига ушбу ташкилотнинг асосий фаолият йўналишлари, жумладан патруль-пост ва йўл-патруль хизмати, уларнинг техник ва транспорт воситалари ҳақида батафсил маълумот берилди.
Делегация аъзолари Сеул шаҳри мерияси (ҳокимлиги)да бўлиб шаҳар маъмурияти аъзолари билан учрашди ва «Сеул бошқарув маркази» интелектуал тизими билан танишди. Бўлиб ўтган брифингда эса меҳмонларга «Хавфсиз шаҳар» тизими ҳақида батафсил маълумот берилди.
Бундан ташқари, делегация аъзолари Ексам полиция участкаси, «U-Gangnam» видеокузатув назорат маркази ва «112» вазиятлар маркази ҳамда «Транспорт назорати маркази»да бўлиб, бу ерда яратилган шароитлар билан танишди.
Тошкент шаҳар ИИББ делегациясининг Кореяга ташрифи давом этмоқда.
Изоҳ (0)