GM Uzbekistan автомобиллари нархи Давлат рақобат қўмитасининг ўрганишларидан сўнг оширилади

GM Uzbekistan автомобиллари учун белгиланган янги (ошган) нархлар 1 августдан эмас, балки бу нархлар Давлат рақобат қўмитаси томонидан кўриб, ўрганиб чиқилганидан сўнг кучга киради. Бу ҳақда «Ўзавтосаноат» раҳбари ўринбосари Умиджон Салимов «Kun.uz»га берган интервьюсида маълум қилган.

Қўмита нархларнинг оширилиши билан боғлиқ ҳолатни ўрганиб чиқади. Бизда моделлардаги опсия (комплектация)лар жуда кўп. Уларнинг ҳар бирини қўмита мутахассислари ва бизнинг экспертлар биргаликда кўриб чиқади. Қўмитада маҳсулотлар нархи қанчага ўзгартирилаётгани ҳақида сўраш ҳуқуқи бор. Энди улар ҳар бир модель кесимида, опсиялар кесимида нархлар неча фоизга оширилиши мўлжалланаётганини кўриб чиқишади, сўнг ўз хулосаларини беришади.

Ҳозир автосалонларга нархларни ошириш бўйича хат юборилмаган. Барча ҳисоб-китобларимизни Рақобат қўмитасига беряпмиз. Улар ҳисоб-китобларни кўриб чиқиб, сўнг бизга нархларни неча фоизга ошириш мумкинлиги ёки бошқача белгилаш ҳақида хулоса беради. Шундан сўнг, уларнинг тавсияси асосида, нархлар яна қайтадан ҳисоблаб чиқилади. Ҳозирча дилерлар шартнома беришмаяпти, тўланган шартномаларга машиналар бериляпти.

Умиджон Салимов, «Ўзавтосаноат» раҳбари ўринбосари

30 июль куни «Ўзавтосаноат» раҳбари Шавкат Умурзоқов 1 августдан GM Uzbekistan автомобиллари нархлари 14 фоизга оширилишини эълон қилган эди. Бироқ 1 август куни «Ўзавтосаноат» матбуот хизмати нархлар ҳозирча ўзгармаслигини маълум қилди.