«Командир, ер думалоқ, ҳали кўришамиз»: ЙҲХБ ходимлари яна қандай пўписаларни эшитмоқда?

Тошкент вилояти Йўл ҳаракати хавфсизлиги бошқармаси томонидан ўтказилаётган рейд тадбирлари давом этмоқда. Бу ҳақда ЎзА хабар берди.

Вилоят ЙҲХБ матбуот хизмати 27 июль куни Янгийўл тумани ва Янгийўл шаҳрида ўтказилган тадбирлар тафсилоти ҳақида хабар берди. «Рейд давомида тўхтатилган ҳайдовчиларнинг муомаласи кишини ажаблантиради», дейилган хабарда.

Қоида бузган ёки тегишли ҳужжатларида камчилик аниқланган ҳайдовчиларнинг «Командир, ер думалоқ, ҳали кўришамиз», «Командир, бизда ҳам қолиб кетмас» ёки мобил телефонидан «акахонларига» телефон қилиб, «Мана, телефонни олинг, ҳеч бўлмаса, телефонга жавоб беринг» қабилидаги иддаоли, дўқ-пўписа оҳангидаги гапларини ЙҲХБ ходимлари тез-тез эшитмоқда.

Матбуот хизмати хабарида таъкидланганидек, бу каби мантиқсиз ва куракда турмайдиган гаплар энсани қотиради. Ўз ўрнида савол ҳам туғилади: автомобилни бошқариш олдидан зарур ҳужжатлар бор-йўқлигини бир қур кўздан кечириш шунчалик қийинми? Ёки ҳайдовчилар шу қадар ҳафсаласиз, очиқроқ айтганда, маданиятдан йироқлашиб бораяптими?

Қизғин жараёндаги рейд тадбирлари давомида транспорт воситасини тегишли ҳужжатларсиз, ойналарининг рангини ўзгартирган, асосан қорайтирган ҳолда, белгиланган тартибда рўйхатдан ўтказилмаган, яъни газда ишлаш учун қайта жиҳозланган транспорт воситаларини ҳужжатсиз бошқарган 189 нафар ҳайдовчи аниқланиб, уларга нисбатан маъмурий баённомалар расмийлаштирилди. Улар бошқарувидаги транспорт воситалари вақтинчалик жарима майдончасига қўйилди.

Рейд тадбирлари 28 июль куни Чирчиқ шаҳрида давом этди.