Ўзбекистон ТИВ Консуллик-ҳуқуқий департаменти Россияга борган Ўзбекистон фуқароларининг муҳожирлик рўйхатига олиниши борасида изоҳ берди.
Ҳозирги вақтда Россияда чет эл фуқароларини муҳожирлик ҳисобига олиш умумий қоидаларга мувофиқ амалга оширилмоқда. Россия давлат чегарасини кесиб ўтган кундан бошлаб муҳожирлар етти иш кунидан кечикмай давлат идораларига келганлик тўғрисида маълум қилиши керак.
Шундан келиб чиқиб, Ўзбекистон фуқароларини рўйхатга олиш муддати Россия ҳудудига киргандан бошлаб 7 иш кунини ташкил этади.
Ўзбекистон фуқароларини дастлабки рўйхатдан ўтказиш бошқа хорижликлар каби 90 кунгача бўлган муддатда амалга оширилади. Яъни Россияда бўлишнинг рухсат этилган муддати келган вақтдан бошлаб 90 кунни ташкил этади.
Ўзбекистон фуқаролари 90 кунли муддат тугаши билан Россия ҳудудини 3 ойга тарк этиши ёки қолиш учун бирор сабаб мавжуд бўлган ҳолларда вақтинчалик рўйхатдан ўтиш қайдномасини чўздириши лозим.
2018 йил 25 майдан 25 июлга қадар футбол бўйича Жаҳон Чемпионати ўтказилаётган шаҳарларда уч сутка давомида рўйхатдан ўтказиш тартиби амал қилган эди.
Миграция ҳисобига олиш муддатларини бузиш Россия ҳудудидан чиқариб юбориш, киришга тақиқ қўйиш ҳамда 2000 дан 7000 рублгача миқдорда жарима солинишига олиб келади.
Изоҳ (0)