Ўзбекистонда халқаро даражадаги биринчи тоғ-чанғи курорти 2018 йилнинг декабрь ойида очилади. Бу ҳақда бош вазир ўринбосари Азиз Абдуҳакимовга таяниб, «Газета.uz» хабар берди.
Азиз Абдуҳакимовнинг сўзларига кўра, бўлажак Амирсой тоғ-чанғи курорти Тошкент вилоятининг Бўстонлиқ туманида қарийб 900 гектар майдонни эгаллайди.
Лойиҳада умумий узунлиги 21,3 километрни ташкил қилувчи турли мураккабликдаги қорли чанғи трассалари, еттита арқонли йўл, сноуборд хиёбони, спорт мактаби, турар жойлар ва бошқа курорт инфратузилмаси объектларини қуриш режалаштирилган.
Лойиҳанинг умумий қиймати 100 миллион евродан ортиқни ташкил қилади.
Фойдаланишга топширилиши жорий йилнинг декабрь ойига режалаштирилган лойиҳанинг биринчи босқичи ўз ичига узунлиги уч километрдан ортиқ иккита арқонли йўл, умумий узунлиги 12,3 километрни ташкил қилувчи турли мураккабликдаги 13 та трасса қурилишини олади.
Шу билан бирга, декабрь ойига қадар иккита сунъий кўл, вертолёт майдончаси, сунъий қор ҳосил қилиш тизими, қишки тюбинг, 21 та иншоотдан иборат шаҳарча, иккита ресторан, инструкторлик мактаби, чанғи жиҳозларини ижарага берувчи пунктни ўзичига оладиган кўп вазифали марказ ва бошқа муҳандислик-коммункация иншоотларти қуриб битказилиши керак.
Шунингдек, қор сурувчи техникалар сотиб олинган ва улар етказиб бериш жараёнида турибди. Бу мақсадларга тахминан 30 миллион евро йўналтирилган, 300 дан ортиқ иш ўрни яратилади.
Бундан ташқари, бош вазир ўринбосарининг қурилиш майдонига ташрифи чоғида арқонли йўллар ишлаб чиқиш бўйича дунёда етакчи саналадиган Австриянинг Doppelmayer компанияси технологик йўлни намойиш этган. Йўл курортнинг энг баланд нуқтаси бўлган 2292 метргача боради ва у ерда юқори станция жойлашади.
Лойиҳага раҳбарлик Андорранинг PGI Management компаниясига ишониб топширилган. Иккита арқон йўлнинг синови жорий йилнинг октябрь ойига мўлжалланган.
Изоҳ (0)