Фарғона вилояти Ёзёвон туманида мустақиллик байрамининг 27 йиллигига бағишланган халқ сайли ўтказилди, дея «Дарё» мухбири Азизжон Эрматов хабар бермоқда.
Сайил давомида уюштирилган меҳнат ярмаркасида 182 та корхона ва ташкилот қатнашиб, 421 та бўш иш ўрнини таклиф қилди. Ярмаркага мингга яқин киши ташриф буюрди. Улардан 293 нафари иш билан таъминланди. Яна 25 нафар фуқаро жамоат ишларига жалб қилинди. Вилоят ҳунармандлар уюшмаси томонидан 40 нафар қиз устоз-шогирд анъанаси асосида ўқиш учун танлаб олинди.
Банкларга ўз тадбиркорлигини бошлаётган фуқаролардан 61 та мурожаат келиб тушди. Хусусан, Ёзёвон туманида яшовчи Шаҳрибону Усмонова «Халқ банки»нинг туман филиалига имтиёзли кредит олиш масаласида мурожаат қилди.
– «Ҳар бир оила тадбиркор» дастури асосида Шаҳрибону Усмоновага 7 фоизли имтиёзли кредит маблағи ажратилди. «Мақсад кўркам орзу» оилавий корхонаси билан шартнома тузилиб, Шаҳрибону учун тикув машинаси харид қилинди. Энди у бемалол чеварчиликни йўлга қўйиши мумкин, – дейди «Халқ банки»нинг Ёзёвон тумани филиали бошқарувчиси Ўткир Алқосимов.
Вилоят соғлиқни сақлаш бошқармаси томонидан бепул тиббий кўрик ўтказилди. Ижтимоий-патронаж ва рақамли рентген кўчма амбулаторияси ёзёвонликлар хизматида бўлди. Тиббий кўрик давомида 23 турдаги мутахассислик бўйича 98 нафар шифокор иштирок этди.
Жамият саломатлиги ва соғлиқни сақлашни ташкил этиш илмий-тадқиқот институти Фарғона бўлинмаси ходимлари тўғри овқатланиш, тиббий кўрикларнинг аҳамияти, хасталикларнинг олдини олиш, соғлом турмуш профилактикаси бўйича суҳбат ўтказди.
– Сайил давомида ташкил қилинган «Саломатлик куни»да 861 нафар фуқаро тиббий кўрикдан ўтказилди. Уларнинг 161 нафарида турли касалликлар аниқланиб, 129 нафарига амбулатор, 32 нафарига стационар тарзда даволаниш учун йўлланмалар берилди, – дейди Жамият саломатлиги ва соғлиқни сақлашни ташкил этиш илмий-тадқиқот институти Фарғона бўлинмаси директори Муталибхон Акбаров.
Изоҳ (0)