Farg‘ona viloyati Yozyovon tumanida mustaqillik bayramining 27 yilligiga bag‘ishlangan xalq sayli o‘tkazildi, deya “Daryo” muxbiri Azizjon Ermatov xabar bermoqda.
Sayil davomida uyushtirilgan mehnat yarmarkasida 182 ta korxona va tashkilot qatnashib, 421 ta bo‘sh ish o‘rnini taklif qildi. Yarmarkaga mingga yaqin kishi tashrif buyurdi. Ulardan 293 nafari ish bilan ta’minlandi. Yana 25 nafar fuqaro jamoat ishlariga jalb qilindi. Viloyat hunarmandlar uyushmasi tomonidan 40 nafar qiz ustoz-shogird an’anasi asosida o‘qish uchun tanlab olindi.
Banklarga o‘z tadbirkorligini boshlayotgan fuqarolardan 61 ta murojaat kelib tushdi. Xususan, Yozyovon tumanida yashovchi Shahribonu Usmonova “Xalq banki”ning tuman filialiga imtiyozli kredit olish masalasida murojaat qildi.
– “Har bir oila tadbirkor” dasturi asosida Shahribonu Usmonovaga 7 foizli imtiyozli kredit mablag‘i ajratildi. “Maqsad ko‘rkam orzu” oilaviy korxonasi bilan shartnoma tuzilib, Shahribonu uchun tikuv mashinasi xarid qilindi. Endi u bemalol chevarchilikni yo‘lga qo‘yishi mumkin, – deydi “Xalq banki”ning Yozyovon tumani filiali boshqaruvchisi O‘tkir Alqosimov.
Viloyat sog‘liqni saqlash boshqarmasi tomonidan bepul tibbiy ko‘rik o‘tkazildi. Ijtimoiy-patronaj va raqamli rentgen ko‘chma ambulatoriyasi yozyovonliklar xizmatida bo‘ldi. Tibbiy ko‘rik davomida 23 turdagi mutaxassislik bo‘yicha 98 nafar shifokor ishtirok etdi.
Jamiyat salomatligi va sog‘liqni saqlashni tashkil etish ilmiy-tadqiqot instituti Farg‘ona bo‘linmasi xodimlari to‘g‘ri ovqatlanish, tibbiy ko‘riklarning ahamiyati, xastaliklarning oldini olish, sog‘lom turmush profilaktikasi bo‘yicha suhbat o‘tkazdi.
– Sayil davomida tashkil qilingan “Salomatlik kuni”da 861 nafar fuqaro tibbiy ko‘rikdan o‘tkazildi. Ularning 161 nafarida turli kasalliklar aniqlanib, 129 nafariga ambulator, 32 nafariga statsionar tarzda davolanish uchun yo‘llanmalar berildi, – deydi Jamiyat salomatligi va sog‘liqni saqlashni tashkil etish ilmiy-tadqiqot instituti Farg‘ona bo‘linmasi direktori Mutalibxon Akbarov.
Izoh (0)